董團夥率眾上京照肺！唐唐抗命，八方昨日熱情表揚，點知接獲財政司唐辦秘書電話，話唐唐諗諗吓都係決定上京。
呢一招以退為進，更加令八方心服口服。冇錯，今次董團夥六國大封相，上京見主人，係十分之重要，因為胡溫揸莊，要近距離睇吓個金魚缸，今次團夥上京，係成班馬出沙圈，由胡溫親自驗毛色，睇吓有冇流鼻血。隻隻熱門馬都北上，獨係你唐唐唔畀面，咁算點先？
唐唐前日話唔上京，表示香港要有人睇住，證明愛國愛港，唔使得個講字，淨係識飲紅酒打高爾夫，點樣做特首？唐唐一句留守大本營，為咗香港人嘅利益，寧願放棄上京親狎胡總嘅千載良機，呢一樣奉獻嘅精神，相信經已感動咗中央！
正所謂：「遙知兄弟登高處，遍插茱萸少一人」，喺上京擦鞋嘅萬千侏儒之中，唐唐嘅身形特別高大，因為佢明白「吃苦在別人前頭，享樂在別人後頭」嘅道理！
有冇高人指點，就冇人知，不過唐唐今次改變初衷，終於答應上京，姿態亦不同凡響！佢唔會跟大隊，而係噚日攜同妻小上北京，參加民間慶典，順便帶仔女睇吓祖國嘅變化，明日星期三私人放假，禮拜四再同董團夥會合！
嗱，呢一個動作系列，意念構思，就算冇袁和平指點，身位都靚絕荷李活嘞！唐唐上京，係帶住一夥愛國心上，唔係好似團夥一樣，即日來回，當做應酬。對國家有感情，先至預早兩日上定先，遊長城、逛故宮，培養定中國文化嘅龍的心嘅情緒，星期四萬一有得見胡溫，就可以較團夥內嘅對手更快進入角色！
特首熱門馬入晒閘，熱門人選爭住返大陸祭祖，今次上京董團夥名下共有三人：葉澍堃、馬時亨、曾俊華，以有事為由，公然缺席，該三位人士，並非特首人選，即是冇得報名，唔怪得闊佬懶理，唐唐唔上京又上京，證明佢喺國家眼中份量極重，香港冇咗佢唔得，不過今次董團夥北上，中央認為冇咗佢亦一樣唔得喎，第一回合，唐唐贏晒咯！
傳真︰2623-9278
電郵︰