亞視《偶像媽咪大賽》前晚播映，其實個節目早一個禮拜日錄影，大會安排咗八位參賽媽咪玩遊戲同答問題，結果由5號吳蔚珊勝出，不過其他七位輸咗嘅媽咪就覺得大會有「造馬」之嫌，重一齊指摘大會唔公平。
馮仁昭聯絡咗落選媽咪3號謝韻芝，佢話：「喺問答環節中，要主持陳啟泰問晒成條問題先可以㩒鐘回答，試過2號葉潔雯搶先㩒咗鐘，陳啟泰都話再嚟過。當正式開始時，5號吳蔚珊犯規，陳啟泰笑住話佢估中問題，所以佢喺呢個環節都幾高分。」
其他參賽者都覺得咁樣好唔公平，有工作人員話呢個環節唔會計分，不過到最後篩剩五位參賽者時，1號林碧琪同5號吳蔚珊嘅分數好接近，有工作人員同林碧琪講，因為計埋問答環節嘅分數，所以吳蔚珊贏咗，七位落選者都覺得大會涉嫌「造馬」。
對於3謝韻芝嘅投訴，陳啟泰噚日話：「我只係負責問問題，我都有阻止叫佢哋唔好答，最後嗰個環節會唔會加分入去，唔係由我控制。」亞視宣傳科助理總監雷國芬噚日喺電話度話：「我問過監製賴華民，佢話問答呢一個部份冇計分，吳蔚珊贏出完全係評判決定。」
張曼玉喺八八年幫某成人雜誌拍過一輯相，唔知點解輯相最近俾一個署名「朝偉」嘅神秘男人公開拍賣，又話有人開價萬二蚊人民幣買呢輯相。雖然話其中一張係凸點相，但唔知真定假，何況咁做根本唔啱，曼玉嘅影迷更加唔應該買呢啲相。
由於呢啲相嘅版權唔屬於曼玉，所以佢對呢啲網上拍賣亦冇乜符，以後同雜誌或報紙影相，惟有小心啲啦！
楊崢日前為化妝品牌FANCL拍攝新一輯護膚品廣告，着上金色小背心同米色薄紗裙嘅楊崢，喺廣告中做番自己扮模特兒，擺出各種有型有款嘅姿態。楊崢由上午八點拍到凌晨一點，好彩佢朋友專誠從鯉魚門買咗啲海鮮同楊崢最鍾意嘅鮑魚探班，即刻令佢精神為之一振。
周渝民（仔仔）喺台北嘅寓所，四月底疑因電線短路發生火警，屋內嚴重損毀，據知仔仔使咗八十萬港元裝修。而八月嗰陣台灣俾颱風吹襲，仔仔屋企附近又水浸。唔知仔仔係咪當嗰間係風水屋，佢始終堅持將屋企再裝修，鄰居話仔仔屋企日前已開始裝修，經常有工人搬運磚瓦出入，但預計最快要下年初先搞掂，𠵱家仔仔就暫住老友屋企。
韓君婷噚日出席金鐘一化妝品活動，攞住支唇膏大擺甫士。佢話今日生日，特登向劇組請假一天，親自落廚請朋友食飯。韓君婷話：「爹哋以前送過一卡鑽石頸鏈同耳環畀我，佢話今年upgrade到兩卡，佢好錫我，重話我嫁唔出會養我。」
著名鋼琴家李雲迪噚日擔任「第五屆香江明月夜─中秋音樂文藝晚會」表演嘉賓，佢今次會留港八日，順便宣傳佢第三張個人大碟。而喺呢張新唱片中，李雲迪剪咗一頭短髮，重除埋箍咗兩年幾嘅牙箍㖭，成個清爽晒！
