上周末，王永平終於宣布六名署理常秘全部升正做真正常秘，即係首長級第八級（D8），佢哋包括李麗娟、黎高穎怡、張建宗、劉吳惠蘭，梁展文以及盧耀楨。
呢次升級當然意義重大，除咗有職升，有人工加之外，最緊要係六個都一齊升晒，冇大細超，佢哋六人大大話話個個都喺政府做咗二、三十年，都有一定表現先升到呢個頂級位，將來喺呢個位退休，都算名利雙收。八方噚晚打電話恭喜眾人媽打李麗娟（圖），剛抵達北京機場嘅媽打話，有級升，當然開心，六個一齊升晒，對提高公務員士氣有好大幫助。言下之意，大家拚命為特區政府做嘢都值得啲。
李麗娟原來同何志平、唐英年一齊上京出席首屆龍滙中華活動，一共有十四個國家，兩岸四地嘅華人精英大學生參加，除咗今日喺人民大會堂有講座，晚上重會喺長城有個花燈會。
活動完咗，何志平同唐唐會留低，星期四加入北京觀禮團，慶祝國慶喎。
傳真︰2623-9278
電郵︰