愛華頓前日又贏樸茨茅夫，喺聯賽榜同班費多佢哋幾十倍、排第二位嘅車路士只相差一分，令全世界跌晒眼鏡之餘，重威過威士忌。
愛華頓𠵱家帶離之後嘅保頓同曼聯四分，「三哥」位置肯定可以坐到下個月中。其實，英倫有球評家經已公開喺專欄中，表態話對「拖肥糖」嘅評估完全錯誤，大跌眼鏡。領隊莫耶斯賽後都話，球會喺今個暑假度過最艱難時期，不但負債纍纍，加上之前朗尼一定要離隊，搞到自己都心情極差；勢估唔到𠵱家創咗該會英超開季最佳成績，佢歸功球員有鬥心。我求大俠都不得不佩服莫耶斯，話晒經常開「首球」嘅卡希爾都只係用一百五十萬鎊收購返嚟，的確好眼光！
曾因比賽時無「乘人之危」而攞國際足協公平競技獎嘅迪肯尼奧，睇完前日布雷西亞贏烏甸尼斯就話眼火爆，認為布隊文連尼無理由趁對方門將受傷瞓低射波入網。我求大俠絕對同意佢講法，但意大利波不嬲無英國波咁講體面，而布隊賽前一分都無，都幾難同你講體育精神。
前日拿玻里主場和施達迪拿三比三，係降落意丙一組別後首場波。由於已知成二萬人買咗拿玻里季票，意國傳媒特別留意呢場波入座人數，據報埋單有六萬人捧場，連意甲賽事都行埋一邊。呢隊波獲得電影業巨子入主後，野心勃勃，希望成為第二隊費倫天拿，睇氣勢真係唔講得笑。
日本前鋒高原直泰今屆喺德甲嘅漢堡冇正選踢，早前話想離隊，估唔到佢喺星期日對柏林哈化場波一踢正選，就救咗教練托比慕拿。漢堡今屆表現差，領導層向托比慕拿發出最後通牒，如果贏唔到哈化，就要執包袱。好彩高原生性梅開二度，令球隊贏二比一，先救番托比慕拿。
賭博梗要廣開門路先可以賺多啲，所以近日有報話國家體彩中心繼三年前推出嘅足彩後，正研究推出NBA籃彩可行性。據了解，國家體彩中心已備有三個方案，但都係初步計劃，落實睇怕要等季中。既然祖國博彩組織都曉得加多瓣，點解香港嘅馬會唔試吓向政府申請，搞多啲花款？