以前，𡃁仔的時候，準時《翡翠劇場》送飯，《歡樂今宵》已是當日的最後的一個節目，聽完「歡樂今宵再會，各位觀眾晚安」，睇埋波叔及肥姐替現場觀眾簽名，「啪」的一聲，全屋關燈，老竇宣布瞓覺，反正別無選擇，一覺甜睡到大天光。
中學時期，偶爾去一次夜街，午夜十二時是一個死期，過了這時間回家定必有餐好嘢食，藤條燜豬肉是也。不過，當時除了睇午夜場外，基本上亦冇乜夜街好去。
今時今日，唔知搞乜，越搞越夜。大家相約去街，晚上十時許才電話聯絡，決定是否出動，一個小時的梳洗扮靚仔，十一時許到達現場，只見小貓才三數隻，夜鬼大多在凌晨後才陸續到場，凌晨二時，總算人齊；凌晨三時，興致才高，於是轉場地再戰。中環的某些Club是在凌晨三時才人多，有一些甚至營業至早上九時。
就算唔出夜街，在家中也不見得會早瞓，先看預早錄影的《金枝慾孽》、《六十分鐘時事雜誌》及動物紀錄片，再看新鮮出爐的DVD，還未有睡意，上網瀏覽一番，咦？巴塞隆拿大戰皇馬？散場已是四時半，朗拿甸奴與廸高的妙傳看得人龍馬精神，睡意全消，於是拾起一本書細看，不一會，天邊已是魚肚白。慈善伶王新馬師曾好似曾經講過：「如果捱通宵捱到見日頭，食幾多補品都補唔番。」剛想快點入睡，才發現有稿未寫。
唉，越搞越夜，但越夜的確越美麗。