濠江賭業概念果然厲害，經紀黃噚日推介的新濠國際（200），升勢認真凌厲，跌市中都升13.67%，收3.95元，為近年新高，成交股數1374萬股，金額5127.9萬元，新濠成交咁勁抽，一睇就知唔係乾升。
新濠急升，經紀黃贏錢又贏面，自然心情靚，佢重話聽到新濠的投資推介活動仍未完結，稍後又有新搞作都未定。
濠江呢輪當旺，澳門實德（487）近排股價亦見蠢蠢欲動，傳聞上次搞唔成的批股集資活動，可能會舊事重提，但據講形式就可能有變。
經紀陳話，澳門實德上次批股唔成，據講係因為公司當時搞緊遷冊，因技術問題批唔成股，傳聞澳門實德的批股對象係一間上市公司，有人話係與濠江淵源極深的信德（242），可惜最後告吹。近日據講有人想舊事重提，但對象已經有變，可能係其他策略性投資者。
澳門實德噚日升3.57%，收0.58元，成交股數226萬股，金額127.7萬元。
慕容小初