一連兩日講完PS2、XBOX兩大主機廠商，今日最後一擊就講吓近年愈戰愈勇嘅Capcom。《街霸》熱潮冷卻並未令呢間大廠失色，相反不斷創造出《BioHazard》、《DevilMayCry》、《ViewtifulJoe》等受歡迎系列，碰啱今年Capcom重點力谷上述三大作品續篇，難怪成為全場人龍最多嘅展館之一。
記者、攝影：徐影龍、許福合
論展館佔地面積，CAPCOM只算第二線，不過卻有多條排隊人龍延伸出去，計埋坐定定等睇Show嘅觀眾，人數絕對可站喺第一線！咁熱鬧嘅原因，除咗三大勁作續篇全部有得試玩外，重有《街霸》重出江湖、怪誕城嘅Jack化身遊戲角色等，就算排勻咁多條隊等玩都抵番。
推出日期：2004年底
愈係超級大作續篇，就愈係要機迷等得耐，《GT4》、《DQ8》係咁，連《BioHazard4》都要隔幾年先玩到。試玩版並未有精采CG，不過有唔少人物及古怪地方掠過，已可想像到故事之壯大。正式開始玩時，講述Leon被人帶到郊外地方，遇到一老人突變喪屍，跟住就要對付一連串喪屍。雖然初段喪屍好易對付，不過玩家要趁機練熟各種新加嘅動作，如紅外線瞄準、調校射擊角度、轉換狙擊模式等，最搞鬼係打破《BioHazard》武器傳統，居然可槍擊喪屍後，抓啱時間補多腳凌空飛踢！順帶一提，展館內嘅《BioHazard4》試玩版，隨最新《Fami通》增刊號附送，想知更多細節，就要留意嚟緊嘅《爆機狂迷》喇！
推出日期：2004年底
今次玩到嘅版本，比之前跟《BioHazrd：File2》送嘅體驗版更豐富，展館內更播放多段劇情及戰鬥畫面，有更多重要人物和劇情，以及預覽幾隻超惡嘅Boss。型男Dante再次耍帥，有更多招式同動作，花啲心思，可組合出更多Hit數連技。
推出日期：10月底
翻炒幾年前添布頓名作做Game，主角Jack化身動作英雄，肩負拯救怪誕城重任；最騎呢係佢所使用嘅武器，竟然係一團綠色物體黏喺右手，揮出去就可攻擊敵人，好鬼似大團鼻涕周圍「Fing」。Jack重可變身聖誕老人，以禮物作攻擊，成隻Game都相當之幽默，令人期待之作。
推出日期：12月中
Joe可謂近來人氣急升，新作《ViewtifulJoe2》除可使用阿Joe外，女友Silvia今次都落場。現場試玩版中，已經有多達40種新敵人，亦包括大量新場景，如叢林、地下廢墟、古代日本、大雪山及外太空等。不過講到最特別，都要數主角擁有重播功能，將打擊過程不斷重播而造成更大破壞，但唔少人試玩時，因時間掌握不好，重播咗自己被打片段，中招嘅反而係自己。
推出日期：10月底
《FightingJam》集合多代街霸角色同一眾CAPCOM受歡迎人物一齊登場，特別之處係所選用角色會使用番原有嘅操作系統，即可讓玩家以新舊人物對決，究竟誰勝誰負，從現場所見仍以玩家技術較為重要，有好格鬥技，即使用舊系統亦有一拼之力。
推出日期：未定
Namco除咗隻PSP版《NewRidgeRacer》有驚喜外，重有唔少重頭作供試玩。其中就有唔少人排隊玩街機《鐵拳5》，雖然只得兩部對戰機座，不過每局決勝負都係瞬間嘅事，好多人輸咗拿拿聲再排隊玩過，所以《鐵拳5》長期都咁旺場。試玩內容跟5月E3展示時差不多，暫未感覺到角色間強弱有否作出平衡修正。
推出日期：未定
繼兩年前《TOD2》推出PS2版後，終於再有新作出喺PS2度。呢款《TOR》依舊採用卡通畫風、大量角色對話及豐富劇情等特色，而戰鬥系統將同伴連技更為加強，試玩中已可使出魔法搭劍術等連續技，充滿動作Game嘅爽快感。希望跟《TOD2》一樣會推出完全中文版啦。
推出日期：未定
世嘉MegaDrive年代曾紅極一時《獸王記》將於PS2上登場，不過咪以為齋翻炒，除咗主角仍然可以變身外，背景就由古代神話轉換為現代，畫面亦由2D變立體；基本武器一樣係赤手空拳打天下，不過吸夠敵方魂魄後，可變身為獸人（如狼人、龍人、牛頭人等共8種），力量大幅提升。
推出日期：未定
EyeToy仍然係今年SCE主谷遊戲，會場內展出多款唔同玩法EyeToy，除咗現時手舞足蹈式嘅玩法外，更示範咗要配合道具嘅遊戲；其中較特別就係要先戴上拳套，玩家可以直接在電視前出拳打擊，看似同槍Game差唔多，不過玩落就知要打中，手眼配合特別重要！
推出日期：12月底
E.A.嘅《FIFA》，一向係「PC界別」足球Game嘅大哥大！新作《FIFATotalFootball》將會搶攻PS2上，畫面保留電腦版上一向細膩嘅特色，尤其球員特別做得細緻，不過球員動作看來就未及電腦版《FIFA》系列流暢。各位在成為球員嘅同時，亦具備成為監督嘅玩法，可化身為球隊領隊做指揮。將於12月推出。
