噚日天朗氣清，貿發局揀正好日子，邀請一眾傳媒老總揚帆出海，享受一下陽光海風，喺西貢碧波暢泳，貿發局總裁林天福重親自熱情招待，與一眾行家天南地北。
講到香港鞋商喺德國受辱，佢話貿發局海外辦事處一向都有幫助異地嘅港商，甚至普通市民，譬如對方不幸異地入獄坐牢，有求於貿發局，佢哋都會派人探監，睇吓對方有乜需要，又送啲報紙雜誌等佢哋同外界保持接觸。佢話人在外地，人生路不熟，語言又唔通，大家都係香港人，應該要幫吓忙。
貿發局一直大力鼓吹內地企業自由行，𠵱家內地開綠燈，佢話貿發局已聯絡逾百個民企團體及千家企業，參加十一月中喺香港舉行嘅中小企國際市場推廣日，比起去年多好多，香港嘅中介服務商如會計師行亦反應熱烈，一百二十多個展位爆滿，甚至外國投資推廣機構亦有擺位，希望吸引國內民企到當地投資。睇嚟呢條射住香港嘅新水喉開始發揮作用。
傳真︰2623-9278
電郵︰