英格蘭中場碧咸近年負面新聞多多，效力嘅皇家馬德里又踢得唔好，連英國著名沃特豪斯律師事務所近日推出嘅球星商業魅力排行榜中，碧咸都係排第四，落後榜首嘅亨利、第二嘅朗尼同埋第三嘅朗拿度。
呢間專門為國際大企業客戶提供意見，建議佢哋搵乜嘢球星做代言人嘅公司話，碧咸受歡迎程度日減，而且有太多贊助，「面目模糊」喎！反而亨利就喺球場表現好，個樣又唔差，加埋夠性感，一流！
雖然我求大俠都同意呢間公司嘅講法，不過對於佢哋將朗尼排名咁高，就有保留。畢竟，朗尼副尊容係點，大家心中有數，而且佢負面新聞又多，就算𠵱家過咗檔曼聯，係咪真係會好受歡迎呢？
另外，沃特豪斯亦列出咗十大值得留意嘅新星，曼聯嘅基斯坦奴就力壓AC米蘭嘅卡卡排第一；而最令我求大俠欣喜嘅，係我哋嘅中國球員董方卓，啱啱排第十！
西甲聯球隊皇家馬德里由於早前有教練金馬曹辭職，由守門員教練拉蒙帶領球隊，所以特登喺上星期六對畢爾包之前，重新影過張全家福，諗住可以沖喜，為球隊帶嚟新氣象；點知皇馬最後都係輸咗畀畢爾包。有口痕友就話，可能今季隨時要影過第三張全家福。
前法國國腳，自從喺夏天離開咗英超球保頓之後，一直未有落腳。早輪本來同富咸傾到七七八八，重講到可以喺上星期六嘅聯賽上陣咁款，點知突然又傳出個人條件斟唔妥，暫時重未落實簽。原來，係因為伯明翰突然出手，有多個選擇，佐卡夫自然唔心急落班啦！
熱刺今季不敗身俾曼聯打破，領隊辛天尼賽後就大爆半場休息時，見到球證禾頓喺曼聯更衣室同紅魔職球員笑笑口，辛天尼重話，喺開賽前幾日先換球證執法。曼聯今季一直同球證關係拉唔開，判錯或冇判十二碼，補時迫和對手等爭議性論點，難怪領隊多疑喎。
曼城主場輸畀阿仙奴屬正常戰果，孫繼海踢正選就有啲意外；原來國足教練阿里漢早前到德國睇邵佳一，順路過埋英倫睇「老孫」，突然有正選踢喺咪同阿里漢有關？我求大俠就唔知，淨係睇「老孫」今場表現份外戮力，重救咗龍格保射空門個腳，係咪想爭番國家隊個正選位？