北京政鬥，告一段落，中方領導人大執位，洗咗阿江太平地之後，再度祝國慶，胡溫揸正莊，現時守緊行為嘅阿董，自然萬分緊張，竟然下達死命令，全體司局級高官，硬性上京出席九三○嘅國宴，除咗見曾慶紅，董團夥浩蕩出征，重有一個不可告人嘅政治目的，就係重睇吓有冇機會榮獲胡溫賜見，順便接受阿胡重新集體照肺。
十一國慶，每年例行公事，使唔使全棚高官Call齊上京咁大陣仗？人哋廣東省政府，又會唔會成個高層上晒去見阿胡？呢亭浮誇作風，連大陸都開始話要戒，估唔到缺乏自信心嘅董團夥，要親自上去北京近距離探測新主人面色。
不過好多高官私底下都鬼咬咁聲，因為北京一日來回，第二朝倒塔咁早又要仆去出席升旗禮，幾十歲人，你估好似十幾歲咁捱得。聽講有啲局長九月三十日星期四嗰晚有雀局，約定晒腳，老董一聲令下，焗住cancel，搞到個心媽媽聲。但邊個敢說半個「不」字？
嘿，不過下任特首大熱門嘅唐唐竟敢率先抗命喎！佢話自己要喺特區留守大局，所以唔想去。呢一招以退為進，十分高章，因為胡溫係務實派人物，最憎官場浮誇作風，胡溫帶頭廢除領導人出訪、政治局常委機場集體送行嘅公關政治騷，又下令八月唔好再去北戴河，證明胡溫都幾憎人唔曉做嘢、淨識擦鞋。你估阿董帶齊司局級乳豬團體，上北京表演八仙賀壽，騎騎騎咁噬開棚牙，攝石影相，胡溫就會大讚董團夥辦事能力高？
今次都係唐唐有政治智慧，搶先抗命，話要留守大局。董團夥內論權力尊卑，董某之下，第二把交椅應係煲呔曾，佢一向署理開特首個位，但今次阿胡有可能再照肺，煲呔被土共打為港英餘孽，狂插咗好多年，唔去俾阿胡親手摸摸，秤番一秤，日後夜長夢多，所以出現一個空檔，唐唐搶韁，拒絕同阿董一齊浮誇，寧願留守基地，向胡溫證明，香港冇咗成個董團夥睇住個局就得，不過冇咗唐唐喺處就唔得。
萬一到時阿胡見到人頭湧湧，逐個握完手，發覺少咁個，大聲嗌：「小唐呢？」左右家奴，貼個口埋去阿胡耳邊，話咁咁咁，阿胡聽完，大讚：「還是小唐知道輕重！」嘩，唐唐就發達咯！
所以喺一個中國人社會生存，切記擦鞋拍馬屁兼腳底按摩，係一種藝術，有一千種唔同花款，要與時俱進。唐唐今次嘅決定，證明佢作為一個中國人，喺呢一門專科，經已修畢高等課程嘞！
傳真︰2623-9278
電郵︰