九一年由內地移居美國發展嘅華裔女星白靈，憑住佢四圍搶鏡嘅功夫，近年喺荷李活嘅發展都算唔錯，最近重有機會同祖迪羅（JudeLaw）等巨星合作拍新片《轟天戰士決戰明日世紀》。言行一向瘋癲嘅白靈最近接受《紐約郵報》訪問嗰陣，竟然自爆曾經喺內地入過精神病院三年，重接受過一百次電休克療法。可能佢俾人電得多，搞到𠵱家黐黐哋。
白靈話十四歲去咗西藏表演，其間因搭上好多男人而被罰。之後白靈開始覺得生命冇意義，重諗過自殺，最後就被送入精神病院治療，佢回憶話：「我俾人電完後，成日企喺度郁都唔郁，佢哋日日要我食藥，搞到我冇晒知覺，嗰度簡直係監獄！」不過佢話多得住喺精神病院，先至令佢成為一個好演員，而且重計劃將佢喺西藏嘅經歷寫番本書㖭！
白靈又話當時佢成日發噩夢，直至一日佢突然意識到自己係一隻豹先至冇事。原來佢曾經喺南非捕獵過一隻豹，佢覺得自己同呢隻豹緊緊相連，當佢跳舞嘅時候就會展現隻豹狂野嘅一面。白靈重話𠵱家腦入面重有八把聲同佢講嘢，佢就當呢啲聲係朋友喎，真係信不信由你。
陳奕迅（Eason）將榮升老竇，所以佢近日就喺內地馬不停蹄工作，努力賺奶粉錢，日前佢應邀到湖南為《第五屆金鷹獎的明星演唱會》擔任嘉賓，會上司儀重笑佢不如幫個女改名做陳巨星或者陳金鷹，不過Eason即刻話唔好，因為佢想幫個女改個單字名。現場又有歌迷向Eason大送口水肩、奶樽同埋童裝做禮物，真係幫佢慳番唔少。
港姐季軍符思思下個月十號會喺北京參加國際小姐選美賽，佢噚日出發去日本同大隊會合。符思思個爸爸都去咗機場送機，符思思話一向好獨立，所以今次唔怕一個人去選美。佢搞完登機手續後，符爸爸猛叫佢快啲入閘，符思思勁嗲咁話：「爸爸要趕我走呀！」符思思講今次帶咗四十份中國刺繡同首飾送畀其他佳麗做見面禮。
無綫劇集《赤沙印記＠四葉草.2》一班演員董敏莉（Monie）及司徒瑞祈等，昨日出席喺尖沙嘴一商場舉行嘅宣傳活動。當董敏莉獻唱時，突然有人大叫「董敏莉收皮」，事後佢話：「我聽唔到，呢度人太多太嘈。我唔會唔開心，唔可能要全部人鍾意我，但佢哋會成為我嘅推動力，我會令佢哋一年後鍾意我。」
鄺文珣前晚為東華總理梁定宇嘅婚禮任姊妹，其間佢四圍擺甫士，重攬住新娘子梁雅麗錫面珠，搶晒風頭。鄺文珣話：「我下年會幫英國婚紗公司做設計師，重計劃出個人系列，不過我唔係退出娛樂圈，我重有鋪戲癮㗎！」
