新濠國際（200）自從早排公布業績由虧轉盈及投資濠江六星級酒店後，股價急升過一輪，但高位獲利盤唔算多，股價企得非常硬淨，就算上周五大市急回，新濠股價繼續企穩。
經紀黃話，聽聞人哋重有後着，應該未有咁快炒完。新濠除咗股價大升外，成交亦較以往熱鬧好多，據講因而新濠投入濠江賭業的決定，獲芬佬認同，所以唔應再以細價股炒作的態度去睇呢隻股票。
新濠上半年業績轉虧為盈，盈利超過6000萬元，所投資的摩卡角子機娛樂場，雖然家陣規模唔算大，但有人計過數，若果新濠按計劃發展落去，幾年之後將佔濠江角子機市場的最大份額。另外，新濠早排公布拍住老竇的澳門娛樂投資六星級酒店，酒店生意除咗房間飲食之外，當然唔少得新賭場，既然新濠有染指濠江賭業的決心，難怪有人會對佢哋另眼相看。
不過，由於瓣瓣生意都唔細，但資金又有限，有人估計新濠會趁勢好集資。新濠在上周五大跌市中，股價仍升0.72%，收3.475元，成交金額2292萬元。
慕容小初