油價高企，外圍股市不濟，恒指上周五急挫213點，收報13066。大市自8月中起再展升浪，至今已累升1200點，先作調整然後再上，升勢更健康。本港基本因素明顯轉好，港股呢次調整，幅度相信唔會好大，恒指落到12800-12600水平，應已足夠，喺呢段時間，正好趁低收集實力股。
就憑一隻金剛，彩星集團（635）的股價就上升逾35%，由1.02元升到1.37元才出現調整，但股價在高位的承接力好強，相信整固完之後，彩星可向2元水平推進，而大行近日發表報告推介買入，目標價係2.55元。
當年一隻忍者龜，為彩星創造了神話，將於05年12月上畫的《金剛》電影，相信會將神話延續下去。金剛一片由3屆奧斯卡金像導演《魔戒三部曲》的PeterJackson執導，環球片場投資1億美元拍攝，另外再用5000萬美元進行宣傳推廣，預料金剛玩具在明年10月推出時，會掀起搶購熱潮。重有一點，就係環球片場負責宣傳推廣，令彩星要投入的資金大幅減少，對彩星好有利。
除金剛外，集團亦開拓了兩個新品牌，分別係美國電視動畫系列「AtomicBetty」同Delgo電腦動畫電影產品系列，預期可於明年春季推出，這些新產品將會成為彩星明年新收入的來源。
04年度（12月年結）的上半年，彩星營業額4.36億元，升57%，獲利3721萬元，大升275%，每股盈利2.4仙。3大產品支柱，包括忍者龜、水娃娃和迪士尼公主系列等，銷售都有理想增長，期內，忍者龜銷售增加30%，佔玩具業務收入約66%，其他如迪士尼公主升170%，水娃娃則升56%。
下半年，3大產品連同Speedeez會繼續作重點市場宣傳，並會推出新角色造型，由於10月至12月的定單一般佔全年總定單約65%至70%，集團有信心銷售額可達全年目標。
04年全年，估計彩星盈利2.3億元，每股盈利14.8仙。05年，3大新品牌玩具提供貢獻，保守估計盈利可上升至3.7億元，每股盈利0.23元，以10倍PE計，1年目標價係2.3元。國際玩具同業的PE平均約18倍，彩星即使升到2元樓上，相對仍係好吸引。
郭兆誠