改編自經典電腦遊戲嘅恐怖動作電影《生化危機之殲滅生還者》早排喺美國開畫即成為票房冠軍，套戲上映咗十幾日，票房收入已經多過上集，所以電影公司已經計劃開拍第三集。
今集女主角Alice繼續由烏克蘭女星美娜祖華維茲（MillaJovovich）扮演，佢當然有唔少性感演出啦，而上集美娜就露咗一點，佢話係一種奉獻，據聞今集佢會露晒兩點，唔知係咪想證明佢今次係雙倍付出呢？講番Alice，佢上集死裏逃生，今次繼續同其他生還者喺死城Raccoon對抗喪屍，不過今次重要面對一隻變種怪物Nemesis，連番惡鬥在所難免。
而《生》片咁收得，幕後班底可謂功不可沒。雖然套戲係導演亞歷山大韋特（AlexanderWitt）嘅處女作，但係佢曾經喺《帝國驕雄》同《叛諜追擊》等電影擔任攝影師，拍攝動作場面有一手，而且上集導演保羅安德遜（PaulW.S.Anderson）仍然係今集嘅監製兼編劇，所以相信唔會令班擁躉同機迷失望。
另外，呢部戲入面好多情節都同電腦遊戲息息相關，好似Alice跑過條走廊嗰陣有架直升機射爛啲窗，就同《生化危機》嘅《Code：Veronica》開場嗰幕一模一樣，而片尾Alice隻眼大特寫鏡頭，就令人聯想起《生化危機》嘅經典logo，相信班機迷睇呢部戲時特別起勁。