有米老鼠之稱嘅投資推廣署署長盧維思被維港滙搞到一身蟻，分分鐘要燉冬菇，好彩呢位入咗中國籍嘅老外為人睇得開，知道一日未發落，一日都要做，佢噚日大清早又飛去紐約，展開美加之行。
做佢份工就係要不停飛，上兩個星期佢同唐唐飛咗去福建，工作完畢重同啲大陸高官唱K，米老鼠都練咗一兩首飲歌，唱幾句《不了情》，又轉唱《高山青》，八方未聽過，唔知水平如何。
講番美加之旅，聯合國貿易和發展會議剛發表嘅《2004世界投資報告》，都話香港保持到亞洲第二吸引外資嘅地位，僅次於祖國大陸，佢老哥算交到功課。佢重講笑話，立會選舉佢都想馬丁選贏，否則去到邊度都會俾人追問「點解馬丁會輸？」咁就乜嘢美加宣傳活動都作廢。
傳真︰2623-9278
電郵︰