陳冠希（Edison）一向鍾意戴耳環，特別係鑽石耳環㖭，所以佢就用三十萬買咗一隻鑽石耳環嚟戴，不過呢個烏龍王竟然喺屋企除低隻耳環後，胡胡塗塗咁將隻耳環當垃圾丟咗，搞到佢唔開心咗一輪，所以早排某娛樂公司老闆為咗𠱁佢開心，就送番一隻兩卡幾嘅鑽石耳環畀佢。
Edison最近同寰亞公司已經傾緊續約，因為今次係老闆林建岳親自同佢傾，所以雙方原則上都傾好續約喇！原本英皇嗰邊對Edison一直好有興趣，聽講重出到二千萬預支費嚟吸引佢簽約，反而寰亞都畀唔到呢個條件佢，但Edison係聰明仔，佢度過之後，佢覺得林建岳都幾錫自己，佢又同經理人部門相處得唔錯，所以留番低嘅機會好大。
房祖名噚日喺沙田出席音樂會，可能因為太忙，祖名竟然唔記得拉褲鏈，好彩冇春光乍洩。喺會上，祖名被問到佢爸爸成龍日前接受電視台訪問話太太林鳳嬌唔畀面佢，因為佢從來冇答應過出席任何公開活動，但喺個仔祖名嘅活動上就見到佢，祖名惟有話：「媽咪錫仔多過錫老公。」
張可頤同鄧永鏘個妹鄧霓儀近排出雙入對，傳出同性戀疑雲，重有報道話對方送名表𠱁張可頤，佢兩個澄清還澄清，但前晚依然齊齊去派對，張可頤重話冇影響感情，不過亦冇收過名表。講完私事後，張可頤重話公事上同佘詩曼冇不和，佢話：「我哋戲內戲外都咁好，唔係不和，係大家一團和氣。」
許冠傑（阿Sam）下個月八號同九號演唱會加場嘅門票，雖然聽日公開發售，但噚日已經有十個fans喺度排隊，演唱會製作人丘亞葵希望游說阿Sam聽日去售票處巡視，同fans打吓氣。另外，噚日官恩娜同陳苑淇為阿Sam個唱綵排時，重欣賞埋阿Sam準備送畀fans嗰批新絲巾，而且又試咗演唱會為佢哋準備嘅紅番衫㖭。
呂頌賢、陳法蓉同宣萱等幾位潛水發燒友，噚日到橋嘴島參加「國際海岸清潔日」，雖然個個着晒潛水衣，但開頭只有幾位男仔落水執垃圾。陳法蓉因為早前撞車傷到頸部，所以醫生就叫佢唔好潛水，而宣萱就患上感冒，雖然宣萱佢哋冇潛到水，但佢着咗潛水衣後，覺得好熱，所以最後都忍唔住落海濕濕身。
黃貫中（Paul）話自己最近忙緊拍戲，但係問佢拍緊乜嘢佢又唔肯講，噚日佢喺商台話：「唔知講唔講得，今次係做演員，冇收錢，呢個圈朋友係要嚟利用。」之前有報道又話朱茵成日鬧阿Paul睇女，阿Paul話：「好正常，靚女用咁多時間扮靚，唔睇係好冇禮貌。」聽落好似幾有道理咁喎。
嘉禾主席鄒文懷同佢個女鄒重珩日前應邀去新加坡出席港灣城開幕發表會，兼出席電影《新警察故事》喺當地嘅首映禮，鄒文懷於發表會上透露新影城會喺○六年落成，而嘉禾就會投資過億喺影城入面興建十五間戲院，佔地九萬呎，總共會有二千五百個座位，相信屆時可以更有效咁將香港電影推廣到全亞洲各地。
