八方噚日好痛心，直頭係無限惋惜嗰隻，原來我哋嘅土產民主女神余若薇，差啲啲就做咗八方嘅行家，可惜民主太后（Audrey之母）大力反對，令新聞界痛失一位咁才貌雙全嘅人才，八方估唔到身為民主女神嘅母親咁唔民主，唔畀子女自由選擇前路。
對於Audrey來講，記者係一個令佢欽羨嘅職業，佢覺得記者自由自在，既獨立，又可以周遊列國，所以中學畢業之後，就報讀咗一間美國大學嘅新聞系，嗰陣時香港未有浸大，港大同中大兩間高尚學府高尚到連新聞系都冇，讀新聞就一定要去外國浸鹹水。
可惜事與願違，Audrey最終都揀咗港大嘅法律系，而影響佢呢個人生重大決定嘅就係Audrey嘅媽咪。大家唔好以為余媽媽睇唔起記者呢一行，實情係，做母親嘅唔想個女孤伶伶留學番邦，想Audrey留番喺香港升學，先反對個女去美國讀新聞。
就係一個咁平常嘅決定，帶嚟咗咁長遠嘅影響，令香港多咗一個天才橫溢嘅資深大律師，為終審法院首席大法官李國能當年多咗一個令佢自豪嘅女徒兒，令社會上多咗一個民主女神……咪住，余若薇話，其實佢唔鍾意人哋叫佢做民主女神，佢話呢啲稱號不切實際喎。
傳真︰2623-9278
電郵︰