本周兩件，同屬阿媽級。第一件係百利保（617），亦即係富豪（078）控股公司。
今年10.1黃金周，咁啱緊接住中秋佳節，入境處已經估計，將有56萬名內地訪港旅客入境，香港酒店股又可以藉勢炒轉，本來揀富豪最直截了當，不過，百利保身為富豪阿媽，既有炒同氣連枝概念，更何況，睇今年表現，富豪已經率先喺今個月中創1年新高，呢期調整，但講緊重係高過今年4月0.32元高位；反觀百利保，距離今年高位0.285元，講緊重有50%水位。
事實上，百利保既為阿媽，富豪旗下無論酒店業，或者富豪海灣賣得好，利益由下而上，百利保一定受惠。再加埋百利保又控有位於香港仔海旁道，佔樓面面積100萬平方呎大型住宅項目3成權益，呢壇自家嘢，以家陣同區新樓叫價，保守計，可以為百利保套現，起碼15億元。睇前景，因自身業務或來自富豪貢獻，具備雙重爆炸力。黃金周之前，股價挨近50日線0.173元，要兜底。
泛海（129）呢期跑輸同級數地產股好多條街。現價0.27元計，相對5月1年低位0.203元，有33%升幅，但要重返今年2月所創1年高位0.47元，重誇張，要升多74%，有無咁殘？
泛海身為泛海酒店（292）控股公司，炒10.1黃金周，亦有同氣連枝概念。同百利保一樣，泛海優勝條件係好多自家嘢。今期所見，泛海有近百萬平方呎樓面土地儲備，正係計劃年底推出油塘項目，全數套現，講緊7億元，未來業績，會實淨好多。隻股最近5個月喺0.25元水位徘徊甚久，個市有調整，泛海跌落呢個強力支持位，唔怕買。
錢雋