「玩具大王」蔡志明前晚同囡囡蔡加敏出席理工大學酒店及旅遊業管理學院二十五周年晚會，原來佢啱啱做咗理大校董，重話自己同理大有緣，公司二百六十個工程師，有近一成來自理大嘅電子同機械工程系，唔少重係同自己打天下嘅老臣子，所以特別有親切感咁話。呢排地產巿道旺，蔡志明就轉為投資搞飲食，喺尖東開間七千呎嘅日本餐廳，單裝修都花費六百萬，佢重唱反調話自己對樓巿睇多買少，佢話：「𠵱家貴啲，唔係好買得落手，我之前都喺九七、九八股災，同沙士時入貨，平好多。」問佢係咪銀行加息，影響信心？佢就話百分一厘息，實在太平，收租至少有五、六厘，相對影響唔大。
提到有報道話由何鴻燊、鄭裕彤剪綵嘅會所「新冶」變成富豪淫竇，曾經同唔少女星傳過緋聞嘅蔡志明，即時大大聲話自己未去過，佢話：「未去過，我都唔係富豪，人哋嗰啲上晒岸、唔使做，我重要做嘢，晚晚做到好夜㗎，邊有時間去玩，冇去過！」
（圖）蔡志明兩公婆（左、右）同個女蔡加敏（中）一齊出席晚會。
傳真︰2623-9278
電郵︰