吃零食不利兒童腦部發展，要孩子吃得「醒目」可以怎辦？名人媽咪楊羚和陳伶俐昨出席一個公開活動時表示，日常十分注重孩子的健康均衡飲食，不會讓他們多吃零食，以免影響腦部健康，如今孩子也相當聰明伶俐。
楊羚及陳伶俐昨分別帶同三歲兒子王樂天和五歲半兒子林肯，出席一個精靈孩子活動，大談育兒經驗。楊羚說，她十分注意飲食對孩子腦部發展的影響，故日常會培養孩子健康飲食的習慣。她說：「當囝囝開始食糊仔，我已經唔畀咁濃味嘅食物佢食，落少啲鹽，咁樣可以令到囝囝大個咗食嘢食淡口啲，都會覺得啲食物好好味。」
她又說：「零食方面更加會限制，汽水一定冇得飲，譬如會揀芝士、乳酪之類畀囝囝食，呢啲對囝囝嚟講都係零食嚟，但相對就有益好多。」
另一位名人媽咪陳伶俐也謂，日常不會讓兒子多食零食，以免影響其腦部發展。她說：「食零食多數都係餅乾，就算囝囝扭計，我都唔會話刻意用糖𠱁佢。好似𠵱家咁，囝囝都唔多鍾意食雪糕，佢甚至覺得凍，食食吓會唔食。」她認為最緊要是從小開始，讓孩子養成不吃零食的習慣。
本報記者