在《金》劇中，如妃心繫皇上一人，但現實中，鄧萃雯感情卻飽受挫折，除經歷過萬梓良和鄭敬基兩段挫敗感情外，雯女更試過跟有婦之夫的江華傳出緋聞，最後被江華與太太麥潔文聯手夾攻數臭，這一仗，令雯女跌至遍體鱗傷。
「事情過去，唔想再講任何嘢，香港人就係成日睇番過去，所以好痛苦。」
那麼，跟舊情人會否「再見亦是朋友」？
「基本上，大家過去如果係互相鍾意過對方，而當中係冇欺騙成份嘅話，都可以做番朋友，一定唔會視作仇人。」
從前感情生活多采多姿，如今卻變得一片空白，但雯女半點也不覺得寂寞，因為心中有上帝。
「我諗法已經同以前唔同，倚靠一個人畀安全感自己，必定失望，我唔需要喺人身上度攞（愛），我會自給自足，等到自己夠能力嘅時候，先至去愛人。」
自幼父母離異，惟有跟爺爺嫲嫲相依為命。從小，雯女跟父母的關係疏離，但隨着年齡漸長，彼此關係已見好轉，而她母親近日更因為《金》劇而成為女兒的忠實擁躉呢！
「以前迫佢講意見，問佢部劇好唔好睇，佢都只係敷衍話OK啫，但今次《金枝慾孽》，佢就前所未有咁肉緊，成日追問我劇情，好似早排佢先至問我幾時折墮（指劇中如妃），都幾搞笑。」
螢幕上成熟嚴肅的雯女，私下其實十分好動，排球、籃球、乒乓球樣樣皆精，中學時期更是乒乓球校隊成員，只是當時雯女為後備身份，未有機會為學校爭光而已。所以記者便趁今次專訪來讓雯女一展身手。
事實上，雯女除演戲和運動外，對司儀工作亦頗有興趣，希望有機會一嘗做大騷司儀的滋味。據知無綫高層已通知製作部，若稍後有合適的綜藝節目時，讓雯女上陣擔任司儀，大家不妨拭目以待。
撰文：戴彩煥 攝影：仇志中
服裝提供：連卡佛