一眾香港歌手前晚在廣州演出「反盜版演唱會」，Twins成員蔡卓妍（阿Sa）雖力撐艾頓莊在台灣辱罵記者有理，但卻將他比喻為動物，指艾頓莊受到人類影響才作出反擊。阿Sa又謂自己被追訪時，會𤷪到搣自己大髀。
容祖兒、梁詠琪（GiGi）、許志安、Twins、古巨基、莫文蔚和韓國歌星Kang-Ta前晚在廣州天河體育館演出「反盜版歌手演唱會」，除了GiGi因聲沙寧願不唱歌外，其他歌手均不敢咪嘴，全部唱現場。在芸芸歌手中，以Kang-Ta最受歡迎。他表演時，有兩個女歌迷突然衝上台擁抱他。
演出完畢後，蔡卓妍被問到最欣賞哪個藝人？她即透露喜歡郭富城，記者即問她欣不欣賞艾頓莊（EltonJohn），阿Sa說：「都欣賞。」
談到艾頓莊日前到台灣演出時，不滿被記者包圍，以粗言大罵記者，阿Sa竟力撐艾頓莊說：「每個國家文化唔同，或者佢唔鍾意黑麻麻俾人影相呢，或者佢鬧pig唔算好大件事呢，我諗要睇當時情況。」
阿Sa更以動物比喻艾頓莊，她說：「我睇戲啲動物襲擊人類，係因為人類有異樣，動物先會反擊，其實啲狗仔隊追得太貼都好煩，做嘢追住影就冇所謂，私人時間俾人影就好𤷪。」有謂被追訪是紅星的代價，阿Sa說：「我明白，有時我𤷪到搣大髀又唔可以嬲。」
古巨基則談到學友日前表示咪嘴的歌手要自我檢討，基仔說：「學友呢句說話好有說服力，除非身體有問題會影響演出，場地同音響問題係可以用儀器解決，新人就應該唱多啲現場，吸取經驗。」
基仔又謂除非失聲，否則打類固醇開聲都要照唱，他說：「我針對事唔係攻擊人，不如搞個反咪嘴音樂會啦。」莫文蔚也附和說：「咪嘴不如唔好唱，我好珍惜唱歌嘅機會，咪嘴甩咗好易俾人發現。」而早前多次被踢爆咪嘴的許志安前晚則拒絕接受訪問。
採訪、攝影：曾小嘉
