近日城中熱門話題，盡是將於本周六播映大結局的電視劇《金枝慾孽》，該劇臨近尾聲，情節發展更加高潮迭起；一直深得皇上歡心的如妃，終在後宮鬥爭中嘗到慘敗滋味，被皇上打入冷宮。雖然，如妃今回惡人有惡報，理應大快人心，但事實上，在鄧萃雯的演繹下，卻又惹人同情憐憫，對如妃，觀眾實在又愛又恨；鄧萃雯始終嘗到最後勝利。
鄧萃雯在《金》劇中的演出，受到行內行外人士一致讚賞，為入行十九年的雯女再攀事業高峯，而今次，亦是雯女首次不是因為緋聞是非而成為焦點。
「從來冇人好似今次咁，對我工作有興趣而採訪我，以前我嘅新聞，唔係緋聞就係戀情！不過，一直以嚟，我嘅新聞都係緋聞多過是非，我拍戲就拍戲，唔鍾意講是非。」
儘管雯女作風低調，從不喜歡招惹是非，是非仍試過一浪接一浪的衝着她而來。
「有年我幫亞視拍《我和春天有個約會》，唔知係咪因為外援身份容易招人妒忌，記得當時我喺部劇入面飾演一個紅歌星，着衫方面自然唔能夠失禮，點知就俾人話公司偏心，淨係畀晒啲靚衫我着；唔單止咁，後來重傳我喺對手講緊長篇對白時，專登着住件珠片衫喺張櫈度磨嚟磨去，發出啲怪聲嚟騷擾對手，等對手NG，真係幾無聊！
「我喺TVB一向唔係咁嘅人，點解嚟到呢度會係咁？即係呢度環境有問題啦！我覺得，有啲人roll機（正式開拍）前咁好戲，roll機後反而冇晒戲，既然啲人心思咁縝密嘅，不如用喺演戲方面，留番roll機之後做咪重好，一個人冇幾多思維㗎咋！」
面對種種是是非非，又如何見招拆招？
「我會用包容嘅心，諗吓啲人點解要咁做，一個人做一件事，梗係會有一個原因，一定係佢比我唔開心先至咁做，既然佢唔開心，唔通唔包容佢咩？而且，大家拍緊同一部劇，始終坐埋一條船，都唔想隻船沉㗎！」
在《金枝慾孽》中，如妃由得寵變成失寵，嘗盡冷言冷語；現實生活中，雯女也曾體會過被人冷落的滋味。
「呢啲情況成日都會有，因為你唔係talkofthetown，冇乜特別話題講，又或者出席活動着得普通啲，就會被人冷落。講真，呢方面（成為焦點）我唔係好恨，亦都唔會因為被人冷落而唔開心。呢樣嘢究竟好唔好，亦都係兩睇，你以為成日做最矚目一個唔辛苦㗎！人哋係因為對你嘅是非或者緋聞有興趣，先至追訪你，所以未必句句啱聽！但假如我因為做戲做得唔好，而被人冷落，我就會唔開心，覺得好難受。」
曾是無綫當紅花旦的雯女，對如今這一代花旦又有何評價？
「我同佘詩曼合作比較多，我覺得佢係一個有感情、有感覺嘅演員，佢眼中有戲，做得幾好。」
