自從東京遊戲展（TGS）改為每年一屆之後，參展作品愈嚟愈精，所有廠商盡Show旗下大作，令到TGS回復過往嘅熱鬧感。今年XBOX可算比過往幾屆都有睇頭，除咗《HALO2》長期有一大班人爭住組隊試打外，重有《Forza》、《Blinx2》等重頭作品，加埋忠臣Tecmo嘅《DOAUltimate》，以及世嘉隻《OutRun2》等，全部都有得試玩。呢幾隻Game好啱香港機迷口味，相信能吸引更多機迷加入XBOX大軍。
記者、攝影：徐影龍、許福合
對比過往三屆TGS，今年XBOX算係最有睇頭。場內差不多八成作品都係挾住XBOXLIVE!嚟做賣點，大量機迷齊齊試玩受歡迎大作，如《DOAUltimate》、《OutRun2》等，而風頭最勁可算係XBOX王牌《HALO2》，畫面正爆不特止，每次8個人一齊玩，好講同伴間嘅默契，個個玩到鬼殺咁嘈，卒之吸引過百機迷排隊爭玩，相當之有氣勢。
《HALO》全球銷量超過400萬隻，加埋XBOXLIVE!後更如虎添翼。續篇籌備經年，今次喺TGS玩到嘅測試版，比5月時E3更豐富，畫面表現比上集更為精采，不但場景超廣闊兼複雜，就連操控角色都表現得好細緻，裝甲喺陽光底下會反射番光線出去，大大增加真實感，主機運算能力少啲都唔掂。
武器及戰車種類大量增加，而且左右手可分持唔同嘅武器，最啱一手揸刀、一手揸槍，遠近都應付到。戰車方面，有配備火箭發射器的Warthog型吉普車、Ghost飛空艇等，火力強勁兼好使好用，搞到個個爭車揸而打崩頭。故事方面承繼上集，本來人類被外星人恰到死咁滯，幸好主角MasterChief從太空回歸時，帶埋穿上「雷神之搥」嘅強化兵幫拖，抗衡外星人入侵勢力，展開連場激戰。雖然《HALO2》定喺11月9日全球同步發售，不過小道消息稱，香港會早兩日見街㖭。
Tecmo可算係XBOX忠實夥伴，旗下王牌《DOA》新作不斷在XBOX推出都未夠喉，重翻炒PS2時代嘅《DOA》，推出重製版《DOAUltimate》。呢隻Game收錄第一及二集內容，重製目標不但提高畫質、對應Online同加入5.1靚聲咁簡單，而且遊戲好多版圖背景，都係經過重新製作，加入更多細緻物件於場內，令轟飛敵人時特別爽快！暫時所見共有14名角色可揀選，不過肯定不止此數，唔單止Online時打餐懵，就算Offline單打都有排先儲齊隱藏元素，耐玩非常。
而Tecmo最鍾意賣弄嘅多樣化服飾，喺《DOAUltimate》都保留；現場所見，每人起碼有四套衫換，當中重有《DOA沙灘排球》最受歡迎嘅比堅尼，可惜機迷玩親都係Hitomi、Helena等女性角色，未知男角會否整番條三角泳褲，係就超級「沙灘」Feel喇。
上年XBOX賽車代表作係《PGR2》，今年就肯定係世嘉嘅《OutRun2》最受歡迎。雖然MicroSoft展館未有擺放如街機般嘅大型車架，不過憑住世嘉名氣，都有唔少人排隊試玩。機迷除可一嘗駕駛歷代法拉利之外，風光如畫亦係《OutRun》系列特色，而今集重點係玩甩尾，機迷反而可趁超長甩尾時間，欣賞一下身邊明媚景色。
由於XBOX版《OutRun2》支援XBOXLive!，故現場一連擺放四部機座畀人鬥車，其連線表現令人滿意，比街機版2人鬥車重好玩。而XBOX版亦有齊街機所有模式，除鬥車爭排名外，重有專玩甩尾攞心心嘅HeatMode，機迷大可安坐家中試盡各款法拉利嘅甩尾特性。
《Blinx2》號稱全球首個5維空間（5D）遊戲，來頭絕對唔小，所以亦成為今年重頭作之一，遊戲內加入自由控制時間功能，畫面相當卡通化，而且玩落操控相當不俗，亦設有二人對戰模式，可以互相分工合作，一同闖關，重未夠熱鬧，可以玩埋四人對戰模式，分別成為主角酷炫貓及坦姆妲姆團，再以獨有能力攻擊敵人。
《JadeEmpire》對喜歡玩動作同RPG遊戲嘅玩家，同樣吸引，遊戲內戰鬥技能豐富，不同戰鬥技巧多達30種，相對時下一般動作遊戲，畫面當然打得激烈、燦爛好多啦。不過大家唔好以為「係咁打」就算喇！遊戲還好聰明地加入RPG元素，玩落就冇咁單調。動作部份更具備武器、能力升級等玩法，所以過版嘅同時，亦要計劃升級自己，變得更強！
電腦上嘅賽車Game，《NFS》系列絕對不能不玩，今次《NeedForSpeedUnderground2》更進佔XBOX上，現時EA展館就可以第一時間試玩，繼續黑夜飛車嘅滋味；今次XBOX效果相當唔錯，同PC版質素上看來分別不大，各位Fans大可以放心。另外，《Underground》聞名嘅替跑車「化裝」，相信仍然有得玩，所以現場都放咗架同遊戲內跑車似模似樣嘅真車，請各位睇睇「實物」。
遊戲內所有車種資料，都係由原車廠提供，至於比賽跑道，更是從著名賽車場作實地取材及測試，再作模擬製作，各位玩時可以有更真實駕駛感。遊戲內玩家可隨意更換車輛或配件，車身貼紙到車殼都一應俱全，讓玩家創造出屬於自己的戰車。現場同時設有手掣同車架示範，不過看來玩家對車架比較有興趣，即使排隊都要玩到，不過看來難度頗高，玩者大多「勁炒」，賽車好手必定要挑戰。
XBOX嘅視像系統亦於TGS上露面，不過現場所見暫時只能對應視像通訊功能，至於點樣將視像功能連結至遊戲之上，現場暫時未有作出示範。
論賣相，LiveChat同一般電腦用視像鏡頭好似分別不大，不過講到功能就明顯強得多喇！除咗動、靜影像攝錄外，亦加入大量好玩元素，例如可以在視像畫面之上，加入可愛公仔框框，款式重有20款之多；亦可加插聲音，與對方一齊分享。ChitChat緊時，見到對方未有回應，亦可利用手掣嘅震動功能，「震一震」對方，玩法都算多樣化。另外，介面雖然變化唔大，睇到厭時，又可以隨時玩換牆紙，搞搞新意思。
04年尾爆發嘅手提機大戰，雖然喺TGS未見NDS蹤影，不過另一主角PSP卻鋒芒畢露。場內超過15款遊戲實地試玩，吸引大批機迷留連，今日就畀幾款期待作先睹為快，詳細試玩報告請密切留意明天《爆機狂迷》。
喺SCE展館中間，擺放咗20幾部PSP試玩機任人試玩，不過人氣作品只佔一半以下，SCE自家搶眼作只有《TORO》，至於手提版《GT4》則未見影。其他參展廠商就勁得多，以Konami嘅《真．三國無雙》最多人排隊試玩，不過最令人驚喜者，係Namco名作《NewRidgeRacer》，全3D背景兼高速標車，比當年PS2版不遑多讓，相信PSP嘅立體運算能力仍未見底，絕對令人期待。
SCE喺TGS前夕，緊急公布纖瘦版PS2資料，雖然會場試玩機未有換上新PS2，不過都一字排開晒新機，引到唔少人影相，不過總覺得揭蓋式設計唔多靚。順帶一提，SCEH會喺下星期公布行貨版新PS2售價及見街日期。
