中共對港政策喺立法會選舉後有明顯改變，中央首次高調請咗十位民主派嘅候任議員上京賀國慶，進行最高層嘅統戰，誓要收復失地。八方聽聞，胡溫本來想六十個新議員請晒，以示氣派，不過，中聯辦就怕死，唔敢保證班大佬好似長毛、大班同大嚿唔搞嘢，到時叫口號拉橫額咪弊，所以請晒班聽話聽教嘅議員先。
點都好，民主黨九位候任議員，只得單仲偕以資訊科技界嘅代表身份上京。單雞話，佢咁大個仔都未入過人民大會堂，到時一定會拍照留念，有人話單仲偕有回鄉證所以請佢，但係涂謹申夠有證，而且如果你係中央領導嘅人客，冇證都入到境啦。
單仲偕重話畀八方聽，佢上星期六先上深圳同朋友食飯，即日來回，為小心起見，重同埋老婆去，以免俾人砌生豬肉，真係醒目。
白鴿黨主席楊森雖然冇份上京，但係都認為係好開始，佢又話，冇中聯辦嘅人搵過佢。至於馬丁，目前人在法國，十月三日先返港。
八方噚日講過，唐英年會留港睇檔，其他兩司十一個局等主要官員聽講一律都要陪老董上京祝賀，到時胡溫想搵人握手，自然有人會伸出嚟。
轉吓眼，聽日九月二十六日剛好係《中英聯合聲明》草簽二十周年，大家上京之餘，都應該攞番本書仔出嚟睇吓，究竟大陸佬有幾多諾言冇履行，溫故知新，係時候總結吓經驗。記得八方當年初入行，咁大場面第一次見，馬丁當日先睹為快，見到聲明寫住，「香港特別行政區立法機關由選舉產生，行政機關對立法機關負責」，又話「港人治港、高度自治，五十年不變」都唔知幾雀躍，但係二十年後嘅今日，有幾多承諾已成泡影？
傳真︰2623-9278
電郵︰