少年得志　極度放肆
碧咸結新歡Victoria俾人飛

萬人迷碧咸（DavidBeckham）同好多男人一樣都係瘋狂車迷，佢最近喺西班牙買咗架林寶堅尼Gallardo跑車，早幾日佢去練波嗰陣，已經急不及待揸住新歡出嚟晒命。

前後擁25車
大把銀嘅碧咸最近喺西班牙買咗架價值九萬五千英鎊，即係差唔多成一百三十萬港紙嘅銀色林寶堅尼跑車代步，呢架流線型嘅跑車，馬力驚人，時速可高達一百九十英里，絕對襯得起型男碧咸。其實碧咸前前後後擁有過成二十五架靚車，佢第一架愛車係紅色福特，而佢屋企嘅車房簡直係車迷天堂，佢老婆Victoria送畀佢、價值二十萬英鎊（約二百八十萬港紙）嘅法拉利都喺度㗎！

盧絲祝君好
不過，Victoria最近就比較冇癮，皆因佢已經俾HipHop服裝品牌Rocawear飛起，冇得再做代言人，間公司就搵咗名模姬蒂摩絲（KateMoss）嚟頂替佢，更有傳Kate最近搭上Victoria嘅唱片監製DamonDash㖭。
此外，碧咸嘅前度情婦盧絲（RebeccaLoos）最近接受訪問嗰陣，話恭喜Victoria為碧咸第三度懷孕，佢重相信個BB會帶畀佢兩公婆更多快樂喎。