早上行經中環街市，不時見到一團日本遊客，中環街市已經封閉多時，日本遊客究竟來此所為何事？據講石板街一帶，係旅遊發展局推薦嘅香港文物古蹟旅遊點，至於遊客可以睇到乜東東，你問我，我問邊個？記得北京旅遊局副局長「寸」過香港：「香港沒有文化旅遊景點，遊客訪港，只是購物……」佢又講得幾啱噃。
午飯到太古廣場，碰到哈佛博士L，於是向佢請教。博士L話：「香港其實都有文物古蹟可以吸引遊客嘅，譬如張愛玲上海老家仍然保存，每日有遊客專程去睇；我哋去青島，可以參加名作家遺跡一日遊，例如尋訪聞一多。香港有冇呀？有噃，假如香港大學搵番許地山嘅辦公室、張愛玲喺陸佑堂活動嘅蹤跡，到處釘上一塊不銹鋼板，上書『張愛玲讀書之地』，諸如此類，包保遊客聞風而至。其他如蔡元培墓、孫中山策劃顛覆滿清嘅香港革命總部、孫中山坐監地方、中共喬冠華蹤跡、李小龍魂歸天國所在地……只要有啲想像力，點會搵唔到呀？」
似乎有道理，不過呢個特區政府由上到中（中級官員）只會「按章工作」，望住$標誌，腦袋裏只有「地產發財」一個觀念，要佢哋發揮想像力，保護文化文物古蹟之餘，亦可搵錢，未免要求高一啲。譬如域多利監獄曾經收押過孫中山，裏面啲監房，點可以拆去，不如善加利用之，將每個監房（cell）保留，改為藝術家教學或畫畫嘅畫室、圖片展覽室，讓大眾入內參觀學習，豈非妙事？博士L就認為何東家族與其他世家集資五億元，組識非牟利機構，保留中區警署、域多利監獄、中央裁判署建築群，實在非常熱心；只可惜佢哋係對牛彈琴，向一啲不可語冰嘅夏蟲爭取，點會唔激氣。特區政府官員據講只係掛住上海新天地，其他模式冇得傾喎。