有指李彩樺（Rain）因發展不及千嬅和Stephy，而和經理人黃柏高提前解約，前晚阿Rain出席蘭桂坊一活動時，透露賠償金額日內會有決定，雖黃柏高可以讓她分期賠償，但仍令負擔甚重的Rain，百上加斤。
李彩樺、陳小春、關心妍、袁潔瑩、官恩娜、湯寶如和蔡瀾等，前晚到蘭桂坊出席「加州餐廳重開派對之波爾夜」，雖然湯寶如的大露背裝相當養眼，但仍不及身穿tubedress的阿Rain搶鏡，加上阿Rain與經理人黃柏高（Paco）提前解約而掀起連番風波，她的出現自然成為傳媒焦點所在。
有傳阿Rain緋聞男友蕭定一為阿Rain出面傾解約事宜，而她未來家翁蕭若元則為阿Rain孭數賠償，對此阿Rain說：「冇啲咁嘅事，合約自己簽，冇人可以幫我傾任何嘢。今次解約原因，係我想有新鮮感，想轉換一吓環境，大家係喺和平氣氛下雙方達成協議。將來經理人嘅工作，會由我媽咪做住先。」阿Rain又指和蕭定一只是好朋友，對方精神上支持她已感開心。
阿Rain父親目前仍負債纍纍，如今阿Rain因為解約而需要賠償，豈非加重負擔？阿Rain說：「賠償方面可以傾到唔使一次過畀，可以分期付款，但有關細節重傾緊。」問阿Rain今次解約，是否因為發展不如意？她說：「中規中矩啦，但我唔想停留喺中規中矩階段。」
有指阿Rain不滿Paco太偏心楊千嬅和Stephy，阿Rain初時未肯回答，經記者再次追問，阿Rain始說：「Paco對每一個藝人都好好，只係自己要新鮮感啫；天下無不散之筵席，大家唔會一世都一齊，將來見到Paco都唔會尷尬，Paco係我恩師，我永遠感激佢。」
此外，近日有報道指黎瑞恩看不起湯寶如這位「霉友」，湯寶如指她與小恩子是好朋友，有關報道十分無聊，另外，湯寶如表示今年暫時不會出唱片，免得被人指她鹹魚翻生。
採訪：馮美茵
攝影：葉君海
