創富生物科技（340）前日下午出現幾手大手交叉盤上板，噚日隻股即見逆市急升，小初十分奇怪炒家會喺呢個時候開車，於是走去問經紀陳知唔知原因，佢話江湖傳聞創富可能再獲大股東照顧，有資產注入。
創富前日下午，出現一些每股造0.163元，計落有幾千萬銀的交叉盤後，股價已經蠢蠢欲動，噚日逆市炒上，並以全日最高位0.226元收市，升幅高達25.56%，但成交唔算大，金額只有399萬銀。
上海華源集團自從入主創富成為大股東後，曾經注入過輸液生意，之後一直都唔覺有特別動靜，由於華源曾經向外講過，有意自己到海外上市，所以市場對創富日後究竟如何定位存有疑慮，若果阿媽肯繼續照顧嘅話，相信會增加投資者信心。
另外，經紀黃日前估計業績好掂的永恩（210），果然不負眾望，中期盈利勁升兩倍多，有6603萬元，中期息派1.5仙，難怪永恩噚日逆市炒上，股價最高見過0.70元，收0.68元，升6.25%，成交金額2116萬元。
慕容小初