個市今回避唔過美股下跌拖累，恒指散番213點。33隻成份股，得隻裕元（551）高過前日。中移動（941）拉低恒指35點，新地（016）同和黃（013）各拉低21點。
中移動C輪：中移動由24.50元跌到23.95元，C輪自然冇運行，9769收6仙，大散35%，時日無多，下月12日最後買賣，行使價23.88元，溢價2.2%，槓桿率40倍。呢隻末日輪，飛沙走石，交投又少，唔啱一般人做嘢。正路之選，始終係9907與9813。9907喺11月初夠鐘，輪價23仙，溢價1.5%，槓桿率10.4倍（有效8.2倍），引伸波幅35%。吼低位上車，例如20仙嗰頭。9813喺12月初到期，輪價32仙，溢價0.5%，槓桿率7.5倍（有效6.8倍），吼住略低於30仙上車。
新地C輪：新地盤數見人之後，單日散2.75元，收73.25元。唔適宜睇得太淡，樓市始終有得睇，賣樓公司得益。新地再跌1-2元嘅話，值得搵C輪博吓。短期輪對象係9977，下月底到期，輪價57仙，溢價1%，槓桿率12.9倍（有效10.4倍），引伸波幅27%。壽命長少少嘅對象係2125，年底到期，輪價59仙，溢價3.6%，槓桿率12.4倍（有效7.6倍），引伸波幅32%。
和黃C輪：和黃跌1.5元，收61元。若然再跌，可博李超人增持，估計60元守得住。睇多陣，確認60元守得住之後，搵啲C輪博吓反彈，對象係2157。2157明年1月夠鐘，輪價62仙，溢價2%，槓桿率9.8倍（有效7.2倍），引伸波幅26%。
章盛