澳門樓市同香港一樣，又再踏入升軌。美聯三個月前喺澳門開第一間分行，主席黃建業話，短短幾個月，促成多宗大手交易，分行已有盈利。
見有錢賺，美記嗱嗱聲喺新口岸開第二間分行，噚日邀得多家發展商剪綵，地產商有新世界、盈大、恒基、恒隆、中海同信和。就連澳門賽馬會董事總經理李志強，同埋賭王四太梁安琪都有出席，認真畀面。
陣容鼎盛之外，開張儀式又舞獅舞龍，同燒炮仗，場面熱鬧。
眾多發展商中，中海有一段日子冇乜香港樓賣。中海代理董事游偉光話，佢哋喺澳門黑沙環有塊十五萬呎地皮，可以發展五幢成百萬呎住宅，地皮面對珠海，有海景，附近就係九建嘅海明居。明年至決定銷售事項。
澳門近年樓價上升，唔少本港發展商過江投資，聽講，中海希望到時每呎售價可以達到四位數字。
樓市火熱，新高價頻傳，中原指數報四十六點六二點，升零點五八，近一點二六個巴仙，都算幾大。成份屋苑參差，有急升也有大跌，二手業主「有人歡喜有人愁」。
荃灣海濱花園升得最厲害，一個月可以升成十八個巴仙，入市早嘅就飲得杯落。買到天水圍嘉湖山莊都唔錯，因為升幅有近一成半。
不過，西半山雍景臺買家就幾閉翳，話晒係豪宅，樓價一月跌咗一成四，呎價得番六千三，都咪話唔恐怖。大埔中心呎價一個月唔見咗十三個巴仙，下試每呎二千二關口，慘情。
對住啲大升大跌嘅數據，真係唔知點樣解讀樓市走勢，惟有借用證券分析員慣用術語，就係「個別發展」啦。
中國奧運金牌得主所到之處，勢必引起哄動，發展商都乘機搵佢哋幫手宣傳樓盤，和黃番禺大石鎮珊瑚灣畔，噚日請嚟廣東奧運金牌運動員楊景輝、冼東妹、勞麗詩同胡佳等，出席水岸複式洋房開幕禮，即場表演之餘，重一展歌喉。
珊瑚灣畔佔地五百二十九萬呎，可建樓面近五百四萬呎，首期密度低，加入外國各地風情，好似澳洲浪漫風情、法國尼斯風情，同現代藝術風情等，單位二千三至六千五呎。十月一至四號，現場重會舉行嘉年華會。
打麻雀係國粹，唔少人閒時都愛打番幾圈，有啲新盤嘅會所，都將其中一兩間房，闢作娛樂室，放張麻雀枱變身成為麻雀房。
新地屯門聚康山莊噚日開放會所，內有麻雀室，最特別嘅，係添置自動洗牌叠牌功能麻雀枱，打完一鋪之後，只要將麻雀牌推去中間，一㩒制，洗好叠好嘅牌就會升翻上嚟。
呢類自動洗牌麻雀枱，並唔係新發明，不過住宅會所有提供，應該係第一次。
新加坡資金凱德置地，剛以近億三人民幣，購入上海寶山區地皮。
交易係公司轉讓形式，凱德購入持有該地皮公司九成三股權，並有優先權，買埋剩下七巴仙。
地皮近四十三萬呎，可建樓面九十一萬呎，共七百伙，每伙千三呎，明年發售。
蘭西
電郵地址：
