主席：「長毛議員請發問。」長毛議員：「特首，你呢幾年搞咗個建華之亂出嚟，你係唔係要速速落台以謝天下百姓？」特首（笑笑口）：「唔……長毛議員……你呢個問題，我已經答咗好多次，我唔會再答。」長毛議員：「特首，我覺得你一日唔走，香港一日都會冇希望，唔知你同唔同意呢？」特首（家長教訓式）：「唔……長毛議員……我唔同意。但係我想講，如果你想香港有希望，就請你問一啲有建設性啲嘅問題，唔好對唔住投票畀你嘅選民。」
主席：「大班議員請發問。」大班議員：「特首，你幾時先停止官商勾結，停止官商互相輸送利益呢啲事發生呢？」特首（包大人式）：「大班議員，我想話畀你知，香港從來係冇官商勾結，希望你唔好唱衰香港。」大班議員：「特首，係啊，香港係冇官商勾結，因為你又係官又係商，根本官商係同一個人，喺度欺壓我哋啲小市民。」特首（鄙視式）：「大班議員，唔好忘記你自己都係商啊。」全體保皇議員大笑以壯聲威。
主席：「中指議員請發問。」中指議員：「……」主席：「中指議員？……哦……中指議員瞓着咗覺重未醒……」長毛議員突然大叫：「董建華落台！」主席：「請長毛議員尊重一下自己議員的身份。」長毛議員繼續大叫。主席：「根據議事規則，主席係有權下令一啲干擾會議進行嘅人士離場，庭警！……好，下一位，何EE議員……啊，對唔住，一時口快叫錯咗，因為佢一向都係有好多問題要質詢嘅。」
香港的立法會，始終是被人用籠困着，打跛了一邊手腳，全身被人抹黑的冇牙老虎。誰人被選入會，誰人被out出來，其實分別不大。