許志安自從離開黃柏高轉投M8之後，事業一直未有起色，馮仁昭八到佢想簽番黃柏高（Paco），連唱片公司都想換，安仔早排周不時約Paco唱K，雖然同埋佢緋聞女友兼經理人Jenny一齊赴會，但佢一見到Paco就盡吐苦水，話M8幫唔到佢。
其實安仔經理人Jenny以前係M8股東，但早排已經脫離M8，自己成立公司，辦公室搬埋去中環，𠵱家幫安仔手嘅同事都係去中環返工，所以安仔同M8嘅關係已經有名無實。
而安仔同正東唱片嘅合約到出年就約滿，早排正東人事變動，安仔不滿新官上場嘅處事作風，同人呻話公司迫佢做啲佢唔想做嘅宣傳，但佢唔諗吓自己嘅事業下滑，梗係要博到盡。
上星期安仔幫無綫做保良騷時，佢唱完歌返到後台，Paco坐咗喺度，正東高層就坐對面，安仔二話不說就埋去Paco度雞啄唔斷，搞到正東高層面黑黑，真係好唔畀面。
而安仔噚日出席港台職業安全活動，稍後曾志偉幫新城開咪，請佢做頭炮嘉賓，話因為佢成日俾人話用緋聞宣傳，又咪嘴咁，要幫佢平反喎，安仔話：「我好少做深情訪問，亦都唔係平反，其實藝人同傳媒唇亡齒寒啫。」至於到時講唔講感情嘢，安仔話：「睇志偉到時問唔問囉，今時今日嘅許志安乜都會講。」
倫永亮前晚同馬宜靜去新城電台接受訪問，倫永亮透露佢將會同幾個林振強嘅朋友一齊喺十一月出張紀念碟，倫永亮話：「個包裝會寫埋林振強嘅生平，好似成本書咁，再搵啲歌手嚟唱，我自己唱一首，陳潔靈同李國祥都會唱，我𠵱家搵緊憶蓮唱。」
張堅庭同太太楊諾詩日前喺上海出席瑞士愛彼表宣傳，而F1車手莫托亞（JuanPabloMontoya）係該品牌嘅形象大使，亦係嘉賓之一，張堅庭夫婦還跟莫托亞合照。問張堅庭對莫托亞嘅印象，佢就話：「佢好友善，太太重讚佢好靚仔㖭。」咁張堅庭會唔會因太太讚其他男士而呷醋，佢話：「佢雖然靚仔，但唔夠我高。」
曾志偉早前投資咗套電影叫做《當碧咸遇上奧雲》，套戲係由兩位小演員做主角，苗僑偉、米雪同鄧萃雯做配角，結果套戲喺香港亞洲電影節得「獨立精神獎」外，亦入選本屆東京電影節同韓國嘅釜山電影節，成績咁好，志偉安排套戲喺三十號上映，佢話因為兩位小演員要返學，星期六、日先可以拍戲，所以套戲都拍咗半年。
喺十二月出嫁嘅名模歐陽妙芝，噚日喺中環行騷時話為咗籌備婚禮，日日都好忙，覺得好鬼充實，佢話：「真係驚婚後會覺得空虛呀。」佢話未來老公因為平時已經成日飛，所以唔想去度蜜月，妙芝話：「我自己好鍾意旅行，係呢樣嘢同佢唔夾啫，同埋我希望盡快生BB，有仔趁嫩生嘛。」
