日本搖滾激女椎名林檎，最近以樂隊東京事變名義再戰樂壇，成績一樣咁掂，樂隊嘅處女細碟《群青日和》一出，即刻登上Oricon細碟榜亞軍。已經係一子之母嘅失婚女歌手依然同好多少女一樣，好渴望談戀愛，所以佢最近就為日本TowerRecords拍咗輯充滿故事性嘅寫真，佢喺入面同日本著名芭蕾舞家首藤康之扮拍拖，好鬼溫馨。
林檎自從脫咗左邊面粒癦後，似乎想畀fans見吓佢純情嘅一面。適逢呢排日本興「純愛」，佢今次為日本TowerRecords拍攝以純愛為主題嘅寫真。喺寫真入面林檎同首藤好似一對超齡嘅初戀情侶，佢哋喺JR車站月台上十指緊扣，但係又好怕醜咁唔敢望對方，非常搞笑。之後佢哋走到花叢中，首藤重摘咗朵花插喺林檎頭上逗佢開心，分明就係玩老套嚟引大家笑啦。
林檎同首藤拍拖拍到夜晚，去咗沙灘一齊燒煙花。最後佢哋兩個重企喺海浪中心，嚟個深情擁抱，簡直羨煞旁人。