大慶石化（362）一供完股就開車，唞咗兩日氣之後，噚日再發力炒上，有份供股的投資者又賺多啲。經紀陳則話，與其高追大慶石化，不如留意揸咗大慶接近兩成股權的亨泰消費品（197）。
大慶噚日大升7.35%，收0.365元，成交股數有4422.8萬股，金額1556萬元。大慶早排按2供1比例，每股0.30元，供股集資1.45億元，以噚日收市價計，參與供股者帳面賺21.67%。
亨泰作為大慶主要股東，亦用咗2633萬銀供股，計埋之前入股的成本，前後共用成5000幾萬銀，若果大慶股價上升，斷估亨泰亦會水漲船高。
小初記得，亨泰年頭買大慶股份一事，芬佬並唔受落，但有人沽貨之時，亦有人接貨，包括金手指在內的芬佬密密收集。經紀陳話，據聞係有人睇好大陸消費品市場，個別芬佬喺9月份，曾在0.90元樓下增持。
亨泰噚日微跌1%，收0.92元，但成交就唔多，只得117.5萬股，金額107.5萬元。
慕容小初