法甲聯班霸巴黎聖日耳門上季換咗教練夏歷賀錫執教，表現回勇，即使將朗拿甸奴放走畀巴塞隆拿，都可以攞到個聯賽亞軍，今季季前重成為聯賽冠軍大熱門；點知一個暑假之後，成隊波即由天堂打咗落地獄！
前晚一輪聯賽，呢支首都球隊作客朗斯，踢到八十分鐘都重贏緊二比○，球迷都諗住佢哋終於「反底」；原因今季踢咗八場波，包括法國超級盃及歐冠盃，重未試過喺九十分鐘內贏波。
點知朗斯三兩下手勢，就即刻追返二比二完場；聖日耳門終於都係「九不勝」，我求大俠都戥佢哋心噏，鍾意追「反底」嗰啲球迷就慘囉。稍稍值得慶幸嘅，係呢場亞洲盤佢哋受讓平/半，叫做贏到今季第一個盤啦。
記唔記得車路士領隊摩連奴，喺周日聯賽被熱刺守和○比○後狠批熱刺啲波悶，淨係識「巴士塞龍門」死守唔識攻。前晚聯賽盃熱刺又作客，大勝低兩班嘅奧咸六比○，打番摩連奴一巴掌！人哋當日守你代表尊重你隊波夠勁，摩生贏唔到賴地硬，我求大俠都覺得呢一巴打得痛快。
剛打入中國網球公開賽八強嘅細威莎蓮娜，贏得觀眾熱烈歡呼，只有一個人對佢不屑一顧，就係細威喺上海嘅御用司機。呢位姓郭嘅仁兄向國內嘅傳媒大罵細威最鍾意擺臭架子，從來唔打一個招呼，重成日黑起塊面，冇啲教養。郭生話最希望細威快啲走人，唔使再受佢氣喎！
咪以為靚仔先有權偷食，好似個樣完全唔掂嘅維拉中場軒祖咁亦甚有女人緣。呢位二十七歲球員啱啱先喺六月同細佢一歲嘅碧姬結婚，但因為出去搞搞震，可能離婚收場。軒祖今屆喺維拉只踢過三場比賽，未得領隊奧拉利重用；好心佢修心養性，搞好自己嘅足球事業啦！
雖然英格蘭中場謝拉特因傷而踢唔到下月初兩場世盃外圍賽，但威爾斯亦唔見有着數；事關佢哋嘅中場悍將沙維治因喺對北愛時攞紅牌，結果上訴失敗，俾國際足協罰停賽，所以唔可以上陣鬥英格蘭。雖然場波未踢，但𠵱家英格蘭同威爾斯各自冇咗個中場主力，暫時打和一比一。