曾聲言唔擁護基本法嘅長毛,正度橋點樣喺宣誓就職時唔違反呢個承諾,諗緊加入效忠中國、香港人民嘅字眼,今日就會將具體措詞交畀立法會秘書處研究,如果秘書處接納就會以「私家誓詞」宣誓。
不過律政司司長梁愛詩噚日一盆冷水淋落長毛度,詩姐話基本法已規定議員要按法律宣誓,唔應該因個人喜惡而增減字眼,佢重話如果六十個議員都自己搞新意,加加減減誓詞,議會就唔會有一體性,希望各議員尊重基本法同誓詞規定。
另外,阿董特首呢幾日分批約見啲候任議員,惟獨「十點前特首」大班冇份,大班話本來約好上星期六見阿董,但佢去旅行改期,點知到𠵱家都未有新安排,而詹培忠金勞詹講明要同阿董單獨傾,阿董亦冇安排,「三大惡人」中阿董都見咗長毛咯,冇理由怕咗其餘兩個啩。
傳真︰2623-9278
電郵︰