上海姑爺羅康瑞原來不時喺香港，八方噚日出席一個國慶酒上，見佢頭髮斑白，真係歲月不饒人。
羅康瑞話，雖然佢有好多生意喺國內，但係都要不時返吓嚟，因為按大陸規定，如果佢住多過一百八十三日，就要交大陸稅，咁羅老闆梗係唔怕交稅啦，但係大陸呢方面嘅規條並唔清晰，連上海姑爺都唔明，所以都係睇住個日曆，夠日子就走。
羅康瑞早前講咗叫香港人唔鍾意就移民嘅說話，好乞人憎，八方問佢重選唔選特首，佢笑住話已經一早被傳媒玩死，冇機會，梗係唔選啦。
而喺酒會相遇嘅嶺大校長陳坤耀就話，最近都去過上海新天地，但事前冇通知上海姑爺。見到陳校長，八方唔放過問佢係咪會做教統局局長，等李國章可以去頂楊永強嘅空缺，校長一聽問題馬上大笑，耍太極話特首諗乜佢點知喎。咁又係，老董永遠乜都等到最後一分鐘，邊個知開邊瓣？
（圖）陳坤耀校長（右）早排都去過上海，但竟然冇同「主場」嘅上海姑爺單聲。
傳真︰2623-9278
電郵︰