吳文忻上月約滿M8經理人公司，因覺得合作欠火花，故不續約。她又表示曾借三萬多元給公司前助手還賭債，估不到對方去如黃鶴。吳文忻自嘲說：「係我戇居，我儍啫！」
吳文忻上月約滿M8經理人公司，正式結束兩年的賓主關係，現回復自由身的她，暫時無意簽新經理人。日前她在中環接受本報記者訪問時，自言與M8合作以來欠缺火花，又慨歎對公司感到心淡。
吳文忻說：「我未簽M8前都係自己傾嘢，我唔係同公司搞得唔愉快，大家合作冇乜火花，可能我簽公司嘅時候確係市道差，又撞正沙士，但公司亦欠缺為藝人鋪路嘅計劃。」早前有報道指M8財困及拖欠員工薪酬，吳文忻對此說：「我唔清楚公司嘅財政，總之我走嘅時候，公司冇爭我錢。」
不過，令吳文忻在M8時期感到最不開心的事情，是一名公司前助手向她借錢不還，她說：「嗰時公司有個職員叫阿Cat，係負責幫我嘅，之前佢問我借過二萬蚊，但有分期還錢。後來我去珠海拍戲，佢就攞咗我拍戲啲定金過去澳門賭錢，佢虧空公款之後，就走咗上嚟我屋企喊，話輸晒啲錢，又話要燒炭死，又話驚畀公司知道後要坐監，我見佢咁慘，咪借咗三萬二千蚊畀佢填番公司筆數。」
吳文忻續說：「初頭我冇追佢還錢，因為諗住佢喺公司做，點都追得番，點知後尾佢畀公司炒咗，之後重失埋蹤，又轉晒電話，到𠵱家佢都冇還錢畀我。」問她曾否向公司反映此事？她點頭說：「有，但都係自己借畀人，自己戇居，自己儍啫！我諗唔到唔係個助手照顧我，而係我去照顧番佢。」
採訪：朱倬誼
攝影：林德雄
髮型：EricChow（tripleedgeH）
服裝：Dada
場地：Bamboo
