世紀21澳門首間特許經營商噚日開業，加盟商光輝行，係澳門地膽，早於七八年開始經營地產業務，附屬同聯營機構十幾間，新成立嘅加盟店世紀21泛太平洋地產，主攻外國人市場，利用世紀21國際性品牌，招徠外籍客。
公司董事鍾送璣話，睇好澳門投資前景，自從澳門賭權開放，多個賭場相繼落成，對地產市場起刺激作用，尤其新口岸區，個別樓盤年內樓價升幅高達一倍。佢哋計劃今年底前增設一間分行，至明年初，分行數目增至五間，總投資額五百萬。
噚日喺澳門舉行簽約儀式，同香港好大分別，淨係選址，已經夠晒別開生面，唔係分行或者寫字樓，而係喺酒樓筵開二十席，招呼賓客。蘭西入到去，見到幾乎坐滿人，個別貴賓重帶埋手抱BB出席，氣氛相當熱鬧。
西半山雍慧閣重推，噚日第一次開現樓畀傳媒睇，不過上到去至知，原來只係得會所睇。新世界何伍燕榆話，買家最關心嘅新付款方法，等今日開示範單位至一齊講，搞到記者差唔多空手而回。
最後，何太惟有講吓雍慧閣今晚首播嘅新一輯廣告，用樓盤嘅英文簡稱「bp」做骨幹，做到好似高級時裝品牌咁。不過，何太話，原本呢樣嘢都係諗住今日先講，因為唔想大家冇功課交，故提早一日披露。
咁蘭西就唔明嘞，發展商到底噚日為乜要搞記招呢吓？!
風水師幫客睇風水定好壞，但若果連風水師都買嘅樓盤，又點睇呢？
香港置業助理區域經理禤啟豪話，一名塔羅占卜師，剛透過該行，斥近三百四十萬，買入東涌藍天海岸中低層A室一手單位，面積一千零五十二呎，呎價三千二百三十二。
聽講，買家之前只係睇過一次示範單位，就用即供方式入市，買嚟自住。近期樓市好番，呢個占卜師至入市，夠晒精明。
禤啟豪話，藍天海岸今個月至𠵱家，共錄一百八十宗一手買賣，呎價三千三。
發展商餓地之際，致生集團馮積善家族，趁勢標售荃灣油柑頭海景豪宅地皮，中秋假期後，即下周四截標，負責嘅仲量聯行話，有信心一個禮拜賣到，所以標期短，絕非問題。幅地近住汀蘭居，飽覽青馬大橋景，地盤近六萬七千呎，地契准以一倍三三，發展八萬九千呎樓面，但城市規劃容許最高可以兩倍一起樓，即可建樓面達十四萬呎。
據聞，業主月前以私人協議方式放盤，索價近兩億。今次仲記咁有信心一星期搵到買家，睇嚟已有實客到價，只係招標確保價高者得。
卓能地產同遠展都喺附近有地，不過論出價，可能不及近期密密吸地嘅信和、恒地、新地同埋長實等大「孖沙」勇猛。
市道轉旺，發展商或者業主都趁勢出貨。渝太過去幾年心思思想轉租為售嘅淺水灣寶晶苑，搵過多間代理拆售，又試過招標，淨係示範單位都開過四五次，最後都因為價錢唔理想而不了了之。呢個盤近日又再度委託代理出售，呎價萬五，間屋三千六呎，每間叫價超過半億。
雖然個市好咗，不過，有一定樓齡嘅洋房，要賣到好價，都唔係咁易。
雖然奧運會已經完結，但中國奧運健兒嘅旋風就重未過去，風頭最勁嘅跳水隊員郭晶晶同田亮，早前喺廣州出席一個商場活動，吸引唔少市民攞簽名。中原一姐劉瑛琳都唔執輸，託人幫佢上廣州攞簽名，噚日重着住件衫出嚟畀大家睇吓，果然有辦法。佢話，下次要到過年先至再着呢件衫。
商廈物業今年炒風熾熱，但踏入第三季，就靜番好多，利嘉閣分析土地註冊處資料指出，截至本月二十一號，第三季商廈摸貨只有三十八宗，比第二季少咗三成一。
平均獲利幅度都細咗，由第二季嘅十點二巴仙，降到得番三點一巴仙。
不過，當中都有部份係短炒個案，持貨日子最短，係尖東康宏廣場十九樓十一室，六日就賺咗六十六萬，幅度係十七點八巴仙。
獲利幅度最大係九龍城富士商業大廈，十三日內摸出，執十七萬，幅度有四成三。
蘭西
電郵地址：
