隔晚美股唔掂，港股冇乜受到影響。下晝國內股市彈得好急，市場氣氛好番，恒指埋單微有進帳。短期大局，係反覆向上。
長實C輪：新地（016）與恒地（012）收市後派成績表，早段跟大市齊齊向下，試低位後彈得好快。新地最低75.25元，上番76元收市，只係唔見50仙。恒地最低37.60元，收38.10元，反有10仙進帳。長實（001）跑輸啲，收68.50元，跌1元。新地與恒地派完成績表後，估計牛皮，長實跌得多啲，反彈機會較大。
揀長實C輪博反彈執餐晏仔，取主角2249，收72仙，跌5.3%，明年2月到期，溢價5.4%，槓桿率9.5倍（有效6.1倍），引伸波幅32%。4467出爐兩周，輪價57仙，明年4月到期，溢價10.3%，槓桿率12.0倍（有效6.2倍），引伸波幅30%。2249拍埋4467，贏晒，舊輪勝新輪。
國泰C輪：美股大跌係因為油價急升，油價升只係受特殊短期因素影響，好難維持升勢。國泰（293）收13.45元，跌15仙。油價難長期高企，國泰回升有望，吼低買國泰C輪，對象係9170，收14.4仙，跌7.1%，年底到期，溢價3.6%，槓桿率9.3倍（有效8.6倍），引伸波幅32%。
太AC輪：太古揸國泰，航空業務翻生，太古亦有着數。太A（019）收56.25元，只跌1格。吼低位，買太A嘅C輪，標準輪可供選擇者不多，得隻9873，12月初到期，輪價35.5仙，溢價4%，槓桿率15.8倍（有效9.5倍），引伸波幅30%。
章盛