胡溫洗牌大執位，究竟影唔影響特區，成為呢幾日茶餐廳啲茶客同收銀珍及的士佬昌哥等嘅熱爆話題。
本來香港呢一壇，人人都知係中南海「唐曾」揸攤。胡溫一向冇聲出。不過近日形勢有少少唔同。大隻江交槍落台，阿胡喺四中全會講話，突然標咗句「保持香港長期繁榮穩定，是黨在新形勢下治國理政面臨的嶄新課題」，要「嚴格按照特區基本法辦事，不斷開創一國兩制事業的新局面」。
短短兩句，共有三個「新」字：「新形勢、新課題、新局面」。好笑喎，香港依基本法辦事，七年來都日日係咁講，有乜「新」可言？阿胡即是指：以前由於細佬我未坐正軍委主席，香港唔到我話事，現時唔同嘞，我要接手嘞，現時嘅新形勢，黨就即是我，唔係阿江，因此香港係一個新課題，要開創新局面。
阿胡出聲，溫寶亦收到，特意在出訪中亞之前，趕都趕住賜張硃筆簽署嘅特首委任狀畀澳門何，正式打印確認主僕關係，呢個姿態係重中之重，應要好好學習。
跟住重未夠。鏵哥訪京返澳，話阿胡向佢下達「三點重要指示」：一要全面正確貫徹一國兩制，二要總結五年經驗，三要保持穩定繁榮。三句說話陳腔濫調，不過可圈可點嘅係包裝，唔係「建議」，亦唔係「意見」，又唔係「表達希望」，叫做「重要指示」，即是Thisisanorder，特區嘅董團夥收到未？
阿胡咁硬淨，董團夥命運如何呢？阿胡係阿董嘅後底乸，雖然唔慌有好面色，不過既然剩番兩年幾，畀番斗零薄面過生娘，點都唔會趕佢出街乞食，至多叫佢行埋一邊，餵吓雞、剝吓豆、斬柴透火，做吓家頭細務，書就冇份佢讀嘅嘞。
至於下屆特首，就肯定係胡哥話事咯。特區成班精忠分子好認定搶包山嘅新目標，快啲由個舊竹棚擒返落嚟，爬過個新包山喇！
傳真︰2623-9278
電郵︰