過往床上用品廣告多是主角躺在床上拍攝，然而汪明荃（阿姐）日前卻一反傳統，在廣告中除了駕駛遊艇出海外，又與小孩放風箏，實行搞搞新意思。但跟她合作的小男孩太頑皮，要阿姐又哄又𠱁才乖乖合作。
汪明荃近日再獲鄔友正旗下的七海化工邀請，拍攝全新一輯海馬床上用品和床褥廣告，並於下月初推出。日前阿姐到了西貢浪茄灣取景，跟三位小朋友一起放風箏，由於阿姐平日工作忙碌，甚少機會到西貢享受風箏樂，故今次正好寓工作於娛樂，舒展身心。
跟阿姐一起放風箏的小女孩，拍攝期間相當乖巧，頻頻獲阿姐稱讚，相反另外兩位小男孩卻十分好動，不時跑來跑去，甚至埋位準備拍攝時，兩位小男孩竟然偷偷溜走。阿姐、導演和工作人員見狀，惟有捉完雞仔再𠱁他們埋位，場面相當搞笑。
其實除了小朋友頑皮外，當日外景拍攝尚算順利，海馬廣告和生產部經理DebbieCheung接受訪問時說：「平時床上用品廣告都係喺張床度拍，但今次我哋想特別啲，所以先至叫阿姐放吓風箏，希望表達自然同舒服嘅一面。而阿姐揸遊艇出海，就係想表達佢自我同自信嘅一面。
「當日我哋雖然要拍多個場景，但阿姐好專業，我哋由上晝八點拍到下晝四點幾，差唔多八個鐘就全部拍完，過程都相當順利。」
採訪：戴彩煥
