黃偉文（Wyman）和謝昭仁近日在商台拉攏下合作主持節目《八十大壽》，內容主要是圍繞八十年代，Wyman表示最渴望邀請「如妃」鄧萃雯任節目嘉賓，除了是因為她近期人氣急升外，原來早年當紅的鄧萃雯已無時無刻不充斥着Wyman的生活空間。
謝昭仁因多年前參加了日本舉辦的「電波少年」而離開新城，之後便一直留在日本主持電視節目，他表示由於有三個月的空檔時間，加上知道今次開咪合作的拍檔是黃偉文，所以才促成他回港主持電台節目《八十大壽》。
不過昭仁就表示初時對重返電台有點不習慣，他說：「要我報天氣時真係幾驚，好彩Wyman重keep得好好，我好多時諗嘢，個腦都只係浮現咗啲日文出嚟，所以好多時都差啲講咗日文。」
而Wyman則透露多年來一直有人邀請他開咪，不過就覺得時機未到，他說：「即係有朋友叫我出街我唔想出，叫一次唔出、叫第二次唔出，到第十次時你都唔好意思唔出，同埋如果個partner唔係昭仁，我真係未必會考慮。」
問到想邀請誰擔任嘉賓時，Wyman二話不說指希望請到鄧萃雯，他解釋：「因為我有個朋友當年好鍾意鄧萃雯，搞到當時我嘅生活無時無刻都充滿住鄧萃雯，其實我都覺得佢做戲好好，加上佢近期喺《金枝慾孽》飾演嘅如妃一角咁受歡迎，又撞啱我開番咪，我認為係呢一個咁機緣巧合嘅機會下，應該請佢做嘉賓。」
由於節目內容主要是圍繞八十年代，二人都分別道出心目中的八十年代代表人物，Wyman說：「我一定會揀BoyGeorge，佢真係好犀利，有邊個可以將自己變成一個普及娛樂文化標籤，令到大家都咁接受。」而昭仁則大力支持本地貨，他笑言：「我覺得最有代表性嘅人物係開心少女組，因為我重keep住一個筆盒，上面係貼咗佢哋嘅貼紙，我當時因為怕刮花，重搽咗層光油喺上面。」
採訪、攝影：李珮洳 場地提供：蓮香樓
