馮華健出任廣播事務管理局主席都成年幾兩年，噚日同傳媒食飯諗住講吓廣管局嘅工作，特別係佢哋剛好完成咗首宗關於有線投訴無綫同亞視聯手競投○二年世界盃節目，令有線賣節目畀兩個台嗰陣收少咗錢。
不過，同中方一直有偈傾兼且係全國政協委員嘅馮華健食飯，大家話題自然會扯到選第三屆特首上面。佢話𠵱家城中熱門人選自然係唐英年同吳光正，唐英年𠵱家喺政府度做，自然有優勢，但係亦有可能遇到障礙（好似政府施政失誤），吳光正反而從商就可置於事外。至於黑馬就有曾蔭權、梁振英、李國章同范太等。
問佢會唔會入局，馮華健就話自己無意從政，至於會唔會做律政司司長，就叫記者去問吓廖長城。反而佢對𠵱家廣管局嘅工作幾有興趣，特別係市場嘅反競爭問題，認為有挑戰性，日後兩局合併話唔定佢會有興趣出任超級監管機構嘅主席都未定。
傳真︰2623-9278
電郵︰