立法會功能組別選舉，工程界功能組別兩位候選人之中，何鍾泰以二千九百七十三票擊敗陸宏廣嘅二千二百一十六票，連任立法會議員，左丁山老友如建築邦、工程陳、惡佬明等對此甚為失望，因為佢哋覺得何鍾泰過去四年做得平平無奇，完全唔能夠為工程界爭取利益，面對環境運輸及工務局局長廖秀冬，完全冇辦法。左丁山知道小圈子功能組別嘅最大目的係為業界爭利益，唔係為香港爭取民主自由，如果功能組別「代議士」唔能夠為業界爭取利益，如何向佢嘅選民交代？
惡佬明唉聲歎氣咁話：「廖秀冬上台後，只識做環保局長或兩鐵運輸監督，總之唔理工程，成日掛住兩鐵、的士、巴士，沙中線（沙田中環線）興建遙遙無期，我哋行內人早已稱之為『失蹤線』！我哋去東涌開工，空氣污染指數高達二百，污染物從珠三角吹過嚟，廖局長有乜符？去東涌河睇吓有冇魚佢就樂意做騷。廖局長只睇運輸，問吓小環保，不敢理會大環保（如空氣污染）；佢都睇運輸，直巴、小巴、邨巴統統過問，兩鐵頻頻出意外，佢要人交報告。但工程呢？好似唔關佢事噃。」
就算換咗陸宏廣上去，咪係一樣，你估佢一定會有力過何鍾泰咩？惡佬明都承認呢點，不過投票畀陸宏廣算係抗議票，以示對何鍾泰不滿啫。好多新界東選民投票畀梁國雄，就係抱住（一）抗議心態、（二）搵長毛在立法會代佢哋鬧老董，出番啖烏氣。惡佬明話佢嘅地盤內，就有唔少呢類人，因為基層覺得飽受壓迫，中層簽約年期短，日日驚住約滿後冇得撈，個個壓力大，脾氣壞，所以選個長毛，抗議民主黨只說不做，民建聯唔敢做！