唔知巧合定有意，每逢特首選舉期近，回鄉祭祖嘅活動就頻繁好多，唐英年趁到上海及無錫開會之便，同父母回鄉掃墓，重首次踏足唐家嘅發迹地──無錫羊尖鎮嚴家橋村。財爺衣錦還鄉，重大有機會更上層樓，當然值得高興。
唐唐前晚趕回香港，噚日開足一日會，傍晚出席工商界國慶酒會，轉頭又趕下場飯局。八方問佢新聞秘書，財爺下星期係咪隨大隊上京賀國慶，佢話非也，佢老細會守大本營，因為佢下周一會飛上北京出席青協嘅龍滙中華活動，周二返港，冇理由周四又飛過，況且特區都要有人睇檔。
咦，唐唐唔出席，咪少咗一次機會同胡錦濤握手？莫非唐唐胸有成竹，讓賽都唔拘？
（圖）財政司司長唐英年（中）風塵僕僕於中港之間，噚晚在港出席工商界酒會，同外交部及中聯辦官員一齊，喺多位商界同候任議員簇擁下進場。賭王同馬局長都要跟尾。韋志滿攝
傳真︰2623-9278
電郵︰