九月十二日選舉投票前一個星期，成班老友喺中午飯局講起民主黨何偉途事件，有人話東莞公安可能提前釋放何偉途，等佢返到香港，俾全港傳媒追蹤採訪，一來可降低選舉氣氛，二來可以拉低民主黨民望，一舉兩得，何樂而不為。於是大家你一言我一語辯論一番。卒之中貿林話口講無憑，不如每人拎一百蚊出嚟做彩金，輸賭一餐飯。眾人同意，賭提前放人嘅有六位，中貿林與會計M就認為唔會放，左丁山不在場，冇落注。
好嘞，中貿林與會計M贏晒，但中貿林正正經經咁講：「當日大家講笑啫，我哋不應拿選舉大事與嫖妓混為一談，況且大家唔會志在食餐飯。咁啦，如果大家同意，我哋將八百蚊賭注捐咗佢！」左丁山話：「使乜大家同意呀，你兩位贏咗，八百元任你發落。」
中貿林話：「中國婦女聯會有一個扶貧教育計劃，叫做春雷行動，專門幫忙內地貧窮女童入讀小學，我揸主意，捐呢八百蚊畀春雷行動。不過唔夠用噃，一千蚊就可以支持一位女童讀兩年書，你哋不如每位多捐一千！」中貿林連消帶打，認真厲害，眾人惟有乖乖哋捐錢，合共捐咗八千八，交由中貿林處理，轉交「春雷行動」，佢可能加碼，捐夠齊頭一萬。
中國可以投資幾億元去攞一塊奧運金牌，揚威世界，但係鄉間中小學老師就冇糧出，大把兒童冇錢上學。老實講，多啲女童上學，就可能少一個女性到酒店服侍啲大款，少啲中國人嫖妓。