恒指埋單跌32點，其實可以冇跌。滙控（005）收市前1分鐘，買賣盤123.50/124元，成緊124元；收市前40秒，有盤每手掟24萬股，連掟兩球左右，做123.5元，將所有123.50元買盤掟清。跟住123元成些少，電腦判收123元，較前市跌0.50元。本來可收124元，即係恒指可以高番36點，即係埋單可升4點而非跌32點。
恒指C輪：恒指本來冇跌搞到要跌，恒指C輪亦跌，有啲冤枉，可以諗吓趁低兜貨，對象係9911，收21.2仙，跌2.8%，隻輪年底夠鐘，溢價1.8%，槓桿率14.6倍（有效10.1倍），引伸波幅20%。另1隻同類輪2137，亦係年底到期，收23.2仙，跌2.9%，溢價2.7%，槓桿率15.9倍（有效10倍），引伸波幅22%。9911拍埋去，慳咗接近1個百分點嘅溢價，其他數據相若。所以，炒恒指C輪，都係要揀9911。
滙控C輪：既然滙控昨日微跌有啲人為，恢復正常之時應該升番，則滙控C輪博得過。高度回報與風險嘅對象係9876，下月中夠鐘，輪價56仙，昨日跌5%，溢價0.5%，槓桿率22倍（有效18倍），引伸波幅17%。爆炸力同殺傷力低過9876嘅對象有9772，收97仙，跌2%，溢價僅0.5%，槓桿率12.7倍（有效10倍）。
中企C輪：國企跌幅較大，國指唔見97點，升得急調整一下好應該，再跌些少，兜中企C輪，主角係9962，輪價23仙，溢價3%，槓桿率6.4倍（有效5倍），引伸波幅39%。同類輪有9447，但唔夠9962靚。
章盛