大市在高位爭持，重有4日就期指結算，噚日已有消息話會造番低少少，到下個月先再升過。國企亦回得好急，但應該係升後調整居多，大升浪啱啱開始，唔會咁快收工。
銀建國際（171）宣布「大型收購」不良資產，同埋發可換股票據畀大股東信達，噚日復牌，股價一度搶上2.8元，但之後就無以為繼，且沽盤兇猛，要質到落2.425元先有力反彈，收2.5元，跌1個位。
收購消息理應利好，但股價倒跌，相信係市場對銀建今次個「刁」嘅分帳方法唔係幾滿意；同時，股債換股價2.2元，比停牌前收市價折讓太多，亦令到股東唔開心。
不過，睇清睇楚呢個「刁」，其實對銀建真係好「筍」，話唔定未來3年，年年賣不良資產，都可以賺幾億元。
銀建收購569億元人民幣嘅不良資產，所需動用的資金，只係約8億港元，相當於成嚿不良資產的1.5%。本來信達已定實購買價為本金的1.8%至2.5%，最後以1.5%成交，明顯係大股東信達「關照」銀建。
上一單不良資產，銀建收佣3.5%，另外重有獎金。但今次由於已「筍價」買咗手貨，所以唔計佣金，但日後賣出去，在扣除信達的10%管理費後，只要有現金盈餘，信達同銀建就按既定的比例分帳，若不履約貸款的收回率超過2.7%，則信達攤佔7成，銀建就佔3成。
其實，分帳方法既保障信達冇「賤賣」資產，對銀建亦好有利。通常，不良資產嘅回收率，約在8%至20%之間（唔少外資大行都以約20%的代價收購不良資產），就以較保守的10%計。（只係收番1成咋），銀建扣除成本後所得嘅獎金就有13億元；若回收率15%，銀建嘅收益就超過20億元。以3年時間做完成個「刁」計，銀建每年都賺7億元，唔計其他收益，每股都賺0.46元，PE只係5.4倍。
信達出得第2招，相信第3招同第4招會陸續有來，一個「包」每年已可賺幾億元，再多一個「包」，又賺多幾億元，銀建即使升上4完樓上，亦不太過。
郭兆誠